D Schofföre fahre mit de Busse,
vo Olte här nach Fulebach use.
Doch z'Bonige bi dr grosse Chrüzig,
fahrt är Chappu zue statt nitzig.
Was isch denn los, du liebe Maa,
Beck Rene, hesch Heiweh gha ?
Dr Lack Chrischtof, dr Knorr Verträter,
macht es chliner's Donnerwätter,
wenn eine duet uf si Salat
Maggi druuf statt Aromat.
Chrischtof, due doch nid so gumpe,
wäg däm duet d'Knorr doch nid verlumpe.
D'Boniger wei e Mehrzwäckhalle.
S'Projekt het nid ganz allne gfalle.
E Hebebühni set no cho,
zum Uufe und zum Aabe loh.
Dr Grund isch klar, i weiss wieso:
Die wei au mou gross uuse cho.
Mir hei wöue ne Värs über's Moser's mache,
über die gäb's sicher recht vöu z'lache:
Vom Schuelpräsident, vom Schpielgruppekrach,
vo dr Umfroog über die Unfallsach.
Do meint öise Chef: Dä chöit dr nid bringe,
dä isch doch zum Gränne, nit zum Singe.
Mir könne ihn als Zivilschutz-Fän,
als stränge Zucht- und Ordnigs-Män.
Doch denn bringt d'Zyttig, es isch dr Wahn,
es Foto vom Ruedi Selebam.
Dört gsehsch ihn, Herrgott, si mir verschrocke,
a dr Demo vo de Zürcher Rocker.
Wie alt isch d'Muetter vo siibe Chinder,
vo'me'ne Buurehof mit bruune Rinder,
wenn d'Vögeli pfiffe spot i dr Nacht,
ünd dr Vater im Chäller dr Handstand macht ?
Mit so idiotische Prüfigsfrooge,
döi d'Züürcher Lehrer d'Schüeler blooge.
Mir hei im Born en OL gmacht.
Jetz fähle drei, und s'wird glii Nacht.
Dr Lehrer Franz wird wiss und wisser,
är het vor luuter Angscht dr Schiisser.
Worum muess jetz dr Wyss die Rueche
usgrächnet mit ein Auto sueche ?
I warte jetz scho sit'eme Johr,
ha jetz de gli scho graui Hoor.
Dir glaubet's nid, s'isch aber wohr,
das goht no sicher zwöi, drü Johr.
I mein das Lattli für mis Bett,
wo dr Ritter Röbi hoble sett.
Alles redt nur no vom Quer.
Chind und Chegu freut sich sehr.
Nur dr Amme, dä leit sich quer,
ihm gfallt dä dräckig Sport nid sehr.
Mir meine aber, dä Quer sig nid schlächt,
denn zu Hägedorf basst e Schlammschlacht rächt !
Ei-ei-ei-ei, ei-ei-ei-ei !
Hei die Chappeler schöni Bei !
Langi Bei und dünni Bei
Und au starki Mannebei.
Dr Radio Müller het sich gfröit,
und es verzitterets Filmli dräit !
Aus Schwitzer Maa, do hesch es schwer:
Ei mou im Johr muesch neh dis Gwehr.
Dr Rippstei Martin macht das au,
"Wo hesch mi Flinte ?" frogt är d-Frau.
Chasch lang go ziile, das goht nid,
wenn dr Verschluss deheim im Chaschte litt.
