Mir düöi singe, musiziere,
und dir düöit flissig applaudiere.
Mir bänkle jetzt scho sid 10 Johr,
und dir sid immer no ganz Ohr
Mir danke euch und säge drum:
Dir sid s'beschte Publikum !
In Chappu muess me schints jetz spaare,
mit'm Rotstift wärdi hert dri gfahre.
Mir wüsste no ne Möglichkeit,
wie Dir sehr schnäll viel Gäud gspaart heit:
Gäbet eus der Schuelbsuech frei,
und schicket alli Lehrer hei !
Das Spaare wird aber schnäll vergässe !
Am 1. August, bim Jungbürger-Ässe,
goht me go schlemme tüür und fein...
acht jungi Bürger und drissg vo dr Gmein
S'Näfe Viktor, dä schnitt Büsch
mit dr Heckescheeri - wie denn süsch !
Denn goht si nümme, är duet sich frooge,
Hei d'Chinder s'Kabu usezooge ?
Nei, liebe Viktor, setsch nid stritte,
denn du hesch s'Kabu sälber verschnitte !
D'Bränte Zunft die alte Knacker
fiire ihre Herbstbott wacker
Si bschtöue e längi Limusine
und moschde über es Dotze ine
Zersch dr Doni, denn dr Reto
bim Lufti Röbi chunnt scho s'Weto
Denn der Martin 1 und 2,
denn der Alex, dä isch nöi,
denn der Kurt, der Röbi Ritter,
denn der Grufti, jetz wird's bitter,
denn d'Königin dä nätti Spatz,
der Marcel, dä het au no Platz,
der ZM Klaus und s'Chriege Fritz
jetzt wird's mit'em Platz scho zimmli spitz
denn no der Ruedi Selebam
dinn wird's chli äng und s'stinkt scho lang
Dr Franz und der Hansruedi Kohler
i Kofferrum, dört isch's ne wohler
Denn chunnt der Adi no derzue
Der Schofför seit: Halt, jetz isch gnue !
Die Zünftler chönnte doch eso
als Sandwich zum MacDonald go.
D'Stäcklibuebe hei verseit,
hei nid emou es Tannli gschtöut.
Si hei nur Ihre Spunte gfüert
und süsch hei si sich gar nüd grüert.
Nüt verschleipft und kei Beschwärde !
Wartet bis mir zwänzgi wärde !
Der Ady Wyss dä hett versproche:
Kathrin morn due n'ig mol choche !
Ig hol die füürig Hilari-Suppe,
de muess ig drum kei Pfanne schruppe !
Am Hilari het's aber sehr viel Lüt,
Drom git's am Sondig z'Mettag nüt !
Im Prinzip set'isch klar verhüete
zum Plausch bim Schteigere wöue z'biete.
Es Bregg das hout is us de Socke !
Uf däm bliibt s'Näfe Urs jetz hocke !
Ohni Ross chasch nid go faare,
süsch muesch ne sälber zieh, dä Chaare !
Der Wyss Franz, seit me, düöit guet loose
duet jetze afo Alphorn bloose
tuu tuu tuu tuu tuu tuu tuu
tuu tuu tuu tuu tuu tuu tuu
Liebe Franz jetz hesch dr Schaade,
muesch Hörner bloose statt Hörner laade !
Eusi Alte vo der Bränte
chöme hüür als Vogeltante.
So fin so schlank us zartem Holz,
uf settig Väter si mer stolz !
Doch luegsch uf ihri dicke Bränte,
denn gsesch statt Vögel Eliphante.
D'Kanalbank Soledurn die het's glüpft,
der Bankrot heisi i d'Wüeschti gschüpft.
Do wird mit Gäut nur so jongliert,
wo das äch au no häne führt ?
Do duet me ganzi Banke spränge,
aber öises Sackgelt, das sett länge !
I stoh im Kreisu und wett wiiter.
Wo söll ig hi ? Das isch doch bitter !
Uf Hägedorf zu dene Rueche ?
Uf Bonige go Schnägge sueche ?
Uf Gunzge is Fäld go Rüebli zieh ?
Au mit de Wangner hani Müeh !
Cha niene hii, das isch e Scheiss !
Drum fahri lieber no chli im Kreis.
