I dr Schuel do hei si ständig Mais
Im Dorf si derwäge d'Chöpf ganz heiss !
Frau Girard hei'si is Zimmer gschblosse,
der von Rohr Josy het s'Bei i'gschosse,
D'Frou Studer Vreni got mit's im Joor,
eifach i d'Ferie, s'isch fasch nid woor !
D'Musiggschuel setzt Priise ue,
das nimmt im Vonow Aenny d'Rue !
D'Frou Strub isch suur und macht dr Chopf,
woruf d'Frou Meier d'Finke chlopft !
Gäge das tuet dr Müller gar nid bocke,
jetz cha n'är wieder i d'Linde hocke !
Das cheibe Gschtürm macht alli muff,
sogar im Gmeinrot gits dicki Luft !
Mir hätte d'Lösig, s'isch nid zum Lache:
Döit doch eifach d'Schuel zuemache !
D'Schoorniggeli-Manne chlage-n-a:
Bi öis hei d'Froue d'Hose-n-a !
I dr Bränte gits kei Zünftlerin,
derfür zwe Chef und e Königin !
Do hei mir zwe's doch viel schöner:
Jede isch Chef und kei'ne dr Diener !
D'Sächsesiebzger, die stramme Manne,
stelle im Dorf vier grossi Tanne.
Um ihr'ne Meitli Iidruck z'mache,
legge si sich voll i d'Sache.
Plagiere, braschte, döi Bierli chlöpfe
und d'Wolfeler döi'ne d'Tannli chöpfe !
Dr Hansruedi Kohler wott a s'Meer
s'Zältle gfallt ihm nämlech sehr.
Bim Vorbereite isch är perfekt,
Doch das Joor isch's ihm abverreckt !
In Frankrich unde merkt dä Daggu
s'Zält isch immer no in Chappu !
Dr Bischof Vogel, dä isch jetz
Vater worde - läck isch dä spitz !
Im Gägesatz zum Haas vo Chur,
isch dä Vogel gar nid stuur
Dä het au Ziit, der ganz' Tag z'grüble
und zoobe spot no eis go z'.......bätte !
D'Hägedörfer inveschtiere
Wei s'Alterheim nöi renoviere
Schöni Zimmer, e neue Lift,
Aus isch super, was das betrifft
und dass s'nid z'tüür chunnt, tüöi die Nare
Aui Schtorezüg iispare
D'Brack Fritz isch en arme Maa,
het kei Gäld zum Heize gha.
Sini Nacktmodäll im Atelier,
müesse früüre, oh Herrje !
Us Mitleid het drum eine z'Nacht,
i dr Möbufabrik es Füürli gmacht.
S'git nätti Froue und au schöni
und angeri si - ou nid ohni
Doch ei Frou isch nit ganz groote
Uf dr neue Füfzgernoote
Die macht dört druffe, hei ei ei
die ganzi Zit e suure Stei !
Si si ganz nöi, hei wiisi Strümpf ....
Und blau-schwarz, nei das si kei Schlümpf !
S'isch d'Bränte-Zunft - könnsch die no ?
Die si mit em nöie Zunftchleid cho !
Denn bim alte, mit ihr'ne Masse
Döi d'Ränze nümme inne passe
Z'Basu isch jetz öppis los !
Der Asturm uf's Phantom isch gross.
D'Lüt gsesch jetze Schlange sto,
zum nes Billet übercho !
Die chönnte öis ii d'Schue blose
Die würde gschieder öis cho lose !
