Herbstbott 1999
Vor acht Joor het dr Chlaus sich zum ZM1 lo wähle
Am Herbschtbott 1991 - mit ein Ziel aus Regisseur i dr Bräntezunft z'befähle
Keis eifachs Unterfange - bi somene Huufe
Fasnachtsnaare wo zwar chöi fäschte aber öppe mou es übere Durscht döi suufe
18 stuuri und mängisch chli mimosehafti Gringe
Uuh fetz träffe mi scho bösi Blick - bsungers vo ganz hinge
Ig wett versueche jede Zünftler ganz churz und ohni Name z'nenne
- es wär reine Zuefall söttet Dir derbii eine erkenne -
I wett auso jede mit sine Eigeheite churz in Wort beschriibe
Ig hoffe es isch mer keine bös und jede mas verliide
Mir si jo schliesslech e Fasnachtszunft wo gärn chli über die angere lacht
Drum hoff Ig es chunnt keim i fausch Hals wenn jetz mau eine es paar Riim über öis selber macht
Es goht mir nume drum öich klar und düttlich und ganz ohni Hintergedanke z'illustriere
Wie schwär es isch so ne wöude Huufe z'präsidiere
Zerscht aber hani no ne chlini Bitt
Vöued no schnäu öichi Gläser mit chli Spritt
Emene igfleischte Fasnächtler und derzue no Gründer im Amt z'folge
Dasch fasch s'gliiche wie es nöis Reinheft ufzdue - und s'het scho en Dolge
Drum - s'Erb wo dr Chlaus het aaträte dörfe oder müesse
Isch nid grad derzu do gsi, ihm dr Start z'versüesse
Eim z'folge wo i au dene Joore zur graue Eminenz oder ebe zum Grufti isch worde
Zum Glück het sechs öise Chlaus nie mit ihm verdorbe
E Säckumeischter wo uf de Monete hockt wie es Huehn uf sine Eier
Und dänkt - die weis immer nume usgeh s'Gäud - die Geier
Doch wenn's um Grappa goht denn zeigt är sich vo dr spendable Siite
Drum het öise Zunftmeischter au öppe am Morge noch ere Sitzig glitte
ZM2 het dr Chlaus sogar zwee erläbt
dr erschti eher überläbt...
dä wo mou mit vöu Elan und Engagement i Zunft isch cho
Glänzt hüt nur no mit Abwäseheit und drmit dass är immer grad hei wott go
So richtig het är dr Chlaus s'letschte Mol schockiert
Won är aus Revisor d'Billet vom Zunftroot uf en Eiffelturm nid het akzeptiert
Au dr zwöit het dr Chlaus mängisch fasch zum Wahnsinn tribe
Wenn är zum Biespiel s'Fasnachtsprogramm erscht nochem erschte Bott het gschribe
Oder wenn är erscht im allerletscht Momänt hett afo organisiere
Hesch dr Chlaus öppe die mit bleichem Gsicht gseh hyperventiliere
Bim Zügwart hesch scho wies dr Name seit uf s'Züüg vöu müesse warte
Und zwar nid öppe wöu er vöu het gschaffet bim Vater im Garte
Nei, s'Problem isch schlicht und eifach si Terminagända
Wo haut eifach nid cha rede und ihm säge: Dänk de dra!
Sini Uufträg het är zwar immer schön notiert i sim Kaländer
Doch d'Usfüehrig het denn mängisch ghappert, - darf i froge: wie vöu Bierchrüeg händer
Über e Stubeschriiber do woht ig mi nid zfescht usloh - ig bi gloub chli befange
Usser dass sis Liebesläbe stark duet mit dr Zunft zämehange
Nach ein erschte Kuss in ere Hilari-Nacht
Het dr ZM1 es paar Joor später die zwöi offiziell zu Verlobte gmacht
Und au hüt isch' öppe Zunft dr Grund, wenn's bi ihm deheim so richtig kracht
Dir heit's gmerkt dr Zunftrot isch scho dure und au die eint oder ander Eminenz
Es goht wiiter alphabetisch doch wie gseit immer ohni Name derfür mit doppleter Kadenz
Eine vo de öutere Semeschter wo aber immerno für öisi Zunft vöu macht
Und bi sine Vote ganz ruehig und langsam redt - mit Bedacht
Dämm sini Argumänt - si si denn mou artikuliert - si immer stichhaltig gsi
Nur muesch ständig hoffe, schlooft ihm nid plötzlech s'Gsicht ii derbii
S'gitt mänge schrege Vogu i dr Zunft und s'gitt none Füüsiker
Me glaubt's fasch nid - wenn e aalueggsch - doch dä isch no vöu lüüsiger
Chum ghört dä dr Buechstabe F gfolgt vomene äscht - packt dä sini Finke
Und goht schnuer straks a das Fäscht go trinke
Au i dr Zunft het är scho gli dr Ruef bicho
Är chöigi nach dene Fäscht nid mou meh grad stoh
Und sini Fäscht si scho legendär im Dorf - d'Lütt wüsse wie dr Füler finge
S'gitt Four Roses und scho mänge Mäucher het a somene Fäscht glehrt s'Inestäche singe
Dr nöchscht uf dr Lischte isch chli e schwierige Fau
Är baschtlet gärn Bombe aus Larve-Überbau
Doch was vöu schlimmer isch jo fasch verheehrend för ne Schnitzubänkler-Zunft
Si Umgang mit sim wichtigschte Organ - gränzt scho fasch a Unvernunft
I red jetz nid vo dr Läbere und au nid vo sim Elefant zwüsche de Bei
Nei - vo sine Stimmbänder - die löi ne chum het d'Fasnacht aagfange scho allei
De stoht är ame do - parat mit siner Ukulele
Und bringt nume no äs krächze us siner Kehle
Witter gohts mit eim vo öisne erfahrenschte Fasnachtsnaare
Eine wo weiss wie Bass spiele und wie spaare
Är isch dä gsi wo öis junge glehrt het Fasnacht z'mache
Hütt gsesch ne allerdings meh schloofe oder uf ere Raschtstätt dr Car bewache
E ruhige schienbar - doch der Schein trügt - isch öise Schmied
Cha warte wienes Raubtier mit vöu Geduld, zuckt nid mou mid sim Lid
Doch wehe s'passt ihm nid was eine seit, denn sig aber uf dr Huett
De lockt's ne us ein Busch und är zeigt im Angere was für Seich dä verzöue duett
Au är het scho mängi Schtund für öisi Zunft investiert
Nur gäbed em nie es Bongo, das wird nämlech nie me retourniert
Dr Meischter-Choch vo öiser Zunft het mängisch d'Nase ziemlech voll
Wenn a de Bött wieder mol so richtig gstürmt wird, find är das ame nid so toll
Au persönlech hani scho dörfe erläbe was passiert
Wenn me mi Zunftgötti zfescht usefordert und gäg ihn opponiert
Doch isch denn d'Fasnacht ändlech do oder schüsch es luschtigs Fäscht
Chasch sicher si goht är sicher nid aus erschte is Näscht
S'git nume eis won är i sim Läbe bestimmt nie me wett erfahre
Das isch e Fahrt imene Schluchboot uf dr Aare
E Major i de Reihe z'ha isch es speziells Vergnüege
De lehrsch Konzept erarbeite, Standort bestimme und öppe eine rüege
Aber abgseh vo es paar cholerische Minute in Torino
Isch dr Chlaus ganz glücklech gsi mit sim Mister Vino
Oise öutischt Zünftler dä isch mängisch chli verstaubt
Nei - nid mit sine Idee - dänk uf sim Haupt
Sini Vorschläg si im Gägeteil im Chlaus immer willkomme gsi
Wenn's drum gange isch z'überlegge, was söu uf em nöchschte Königinne-Waage si
Dr jüngschti Zünftler het zwar gueti Aasätz zeigt und im Chlaus au imponiert
I sim Mäucherjoor aber vor allem dur militärischi Abwäseheit brilliert
Es wird sech no zeige was är für d'Zunft cha erreiche
Dir chöit sicher sii dr nöi ZM wird ne de scho no eiche
Eine dä het ehrlich gseit e bsungeri Begabig
Dä wird mit jedem Bierli lüüter EHRLICH dasch nur abhängig vo sinere Laadig
Nur bim Singe - aber das ich jo scho en auti Gschicht - duet är anstatt si Kehlkopf z'strapaziere EHRLICH - Vor allem mit de Händ sini Soomesträng massiere
E Bahnhofchef hei mir i öisne Reihe au
Übrigens - dä het schiens gli scho s'dritte Chind - emu mit siner Frau
Är isch chli e schwierige Fau, duet är doch nid grad glänze
Mit Aawäseheit und sogar am Jubiläums-Uusflug schwänze.
Sini Teilnahm i de nöchschte Joor das isch z'hoffe
Wird vo ihm sälber - so Frau will - no übertroffe.
Lang hets duuret bi öisem nöie Mäucher bis är sich het chönne entschliesse
Obwohl är i dr Bräntevilla sit em Aafang het e Stammplatz dörfe gniesse
Viellicht litt's dra das är jetz au uf d'Bühne muess und nümm vo wiitem nur cha winke
Oder wöu mer meischtens Wieswii und nid Wodka Redbull us öisne Becher trinke
Wöu's wie's sig oder sig's wie s'wöu
Dumm schnoore chaner und fäschte au
Dr zwöit Mäucher isch jetzt au ändlich i die Poschtpubertäri Phase cho
Und het gmerkt, dass me doch au ab und zue darf id Fuesstapfe vom Vater stoh
Dass me nid immer wie ne Rebell grad muess uufbegehre
Und sich gäg aues wo vom Vater chunnt muess wehre
Är het drum bi de nie ganz riife Früchtli dr Uustritt geh
Und cha jetz d'Fasnacht ändlech mou ohne Intrige in Aagriff neh
Und näbebii und do isch bsunders im Chlaus si Nachfolger froh
Lueggt är au no, dass am Herbschtbott keine me muess a d'Hauptüebig goh
Dir heit jetz gseh was das bedüttet
Chef si vo somene wöude Huufe - ig hoffe s'heig nech glüttet
Wie gseit ig ha die Ziile nid dichtet im Hiiblick uf die nöchschti Sitzig
Sondern ganz naiv und uneigenützig
Doch eigentlech han j o us eine andere Grund agfange dichte
Wäg öisem ZM1, zum Rückblick haute und nid zum richte
Aagfange het är no i öisem aute Chleid
Mit Spitzechraage, rotem Chittu und eme länge Huet - e wahri Augeweid
Öb aus Hobby-Rocker, Cowboy oder aus Pirat
Sogar aus Caesar mit Lorbeerchranz het är immer e Spruuch parat
Aus Mönch het me ihn sogar scho tituliert
I glaub dä Name het ihm no imponiert
Mit ihm si mir go reise uf Heidelberg, Paris und am Schluss no is Piemont
Und sogar a sim Hochziit hei mir Zünftler gluegt, dass är au no chli drunder chunnt
Und zur Krönig vo sinere Karriere het är sechs denn nid loh näh
Au bim 20 Joor Jubiläum sis Organisationstalent zum beschte z'gäh
Öise Chlaus - ig glaub das darf i säge - isch kei Mediestar
Drum hätt är sech vermuetlech au nid geignet zumene Obernaar
Är isch e stille Chrampfer, wo sech meh im Hintergrund bewegt U
nd drum im Gägesatz zu anderne viellicht au weniger aeggt.
Är isch kei Plägöri wo gärn duet grossi Rede schwinge
Um denn, wenn s'zöut zwee drei fuuli Usrede z'bringe
Nei im Gägeteil - was är aapackt klappt und funktioniert
Meischtens - usser es isch dunkel und d'Stäge si nitzi orientiert
Nei im Ernscht - sini Leischtig die wird me wohl erscht im nachhinein voll realisiere
Vor allem si Nachfolger bim Versuech d'Arbeit au mol z'delegiere
Aber die gröschti Leischtig won är für Zunft erbrocht het, isch
D'Tatsach dass hützobe die 18 stuure Gringe immerno zäme hocke -
und zwar am gliiche Tisch Dir lachet vielliicht und dänket dä isch biireweich
Aber ig meines Ernscht I rede do kei Seich
Wie mängisch het's scho klöpft und tätscht i öisere Zunft
Es si Fetze gfloge - und das nid nur im Früehlig während der Brunft
Doch jedesmol het's dr Chlaus verstande d'Wooge z'glette
Unermüedlech het är mit viel Geduld und Diplomatie –
und mängisch sogar mit ein Versuech döu Lüüt uf Rose z'bette
Derfür gsorgt dass mir wieder zämestöi
Die Leischtig isch's, wo mir ihm z'verdanke hei
Was Ig persönlech no bsungers erwähne wett
Dass är für d'Aaliege vo öis Junge immer es offnigs Ohr gha hett
Bi öisne Wünsch und Idee gseit het ig lo öich freii Hand
Und för öis igstande isch mängisch sogar gäge Widerstand
Chlaus, es isch bestimmt nid liecht für di nach au dene Joor eifach so z'übergeh
Aber ig bi sicher mir wärde au in Zukunft dini Hilf nid säute gärn in Aaspruch neh
E chli Rueh sig dir aber gönnt vor allem nach dem Jubiläumsjoor
Nid das au no dr Räscht verlüürsch vo dine Hoor
Jetz nähmet d'Gläser und stöit uf
Holed no einisch ganz döif Schnuuf
Dr Chlaus söu jetz zum letschte Mou aus ZM1
Wies sit 20 Joor Bruuch isch i öisem Kreis
Dr Trinkspruch aastimme - drüü, zwöi, eis:
uuuuuuuund linestäche umeschloh duurezieh und aabeloh!
