Verse, Geburtstage, Reto 30, Kohli 30, Adi 40
E Brief han eg becho, per elektronischer Post,
ond ned öppe nome, wöu das kei Briefmarke för öppe 99 Rappe chost.
Nei, so esch s'Ziitauter, do si mer mette drenne,
das esch doch ned ganz hondert, eg gloub eg spenne.
Ou jetzt han egs scho brucht, s'Motto vom hötige Obe,
Won egs erfahre ha han eg dänkt, do stöue sech doch einigi Frooge.
Ned ganz hondert duet jo ned grad vöu bedüüte,
das muess me de scho no genauer erlüütere.
Das cha jo vo 1 bes 99 för jedi Zahl stoh,
om well Zahl auso söus genau go?
Öppe grad om d'Zahl 1,
eg mein, das wär emmer no meh aus keis.
Be 2 duet me de scho s'erste Mou stotze,
aber ou die Zahl duet üs be genauerem nochedänke ned vöu nötze.
3 passt do scho besser, för d'Anzahl Jubilare, be vier chönnte mer öis das erspare.
Velecht 5, för d' Volume-Prozänt vom Bier, aber was gsehn eg do,
das het jo nome vier. Jedoch mieche ou 6 Prozänt mer gar nüüt us,
jä was jetzt, chömet der do öppe no drus?
Be 7 chonnt do de weder e chli Ordnig dri,
wie wärs met 8, för d'Aanzahl Mestchratzerli.
För 9 gsehn eg ou kei Grond, 10 wär do de zomendest rond.
Jetzt muess eg das Ganze chli vorwärts triibe,
söscht si mer morn emmer no am Zahle biige.
18 wär s'hötige Datom, es wird gli verschwende,
Oder 20 för d' Anzahl Zönftlergrende.
22 för s' Alter vo der Zonft, der Beste,
die Cheibe si scho so alt ond chöi emmer no guet feste.
25 chöi mer öis secher erspaare,
derför döi mer be 30 de chorz verharre.
Der Adi esch be dere Zahl grad e chli erbleicht,
schliessiech hei mer sis Auter noni erreicht.
Der Reto ond der Chregi döi s'3 höt fiire,
trotzdäm döi mer bem 30-i ned ewigs stoh bliibe.
Mer mache e Gomp, e ganz e grosse,
Schliessiech wott näb ein Chregi ond ein Reto ou no der Adi astosse.
Auso den ne wäre mer bereits be 40 aglangt, jetzt sit der secher aui gspannt.
A dere Stöu chöi mer jetzt ou no ein drette Jubilar gratoliere,
ou em Adi alles gueti förs witere Läbe ond d'Fasnachtskarriere.
Wen eg jetzt aber chli wiiter dänke,
chönnt eg mer der Räscht vo däm Värs eigentlech schänke.
Mer hei zwar no Zahle, e ganz e huufe,
aber kei Gebortstag me, wo mer druf chönnte suufe.
Denn zom 50-iste Gebortstag duet das Johr niemer bette,
döu hei das Johr scho s' 60-iste Altersjohr öberschrette.
Be 70 nemm egs scho nömm so gnau,
ou os 80 wird eg ned schlau.
90, jetzt werds Ingsam weder enteressant,
eg gseh, der sit ou scho ganz gspannt.
Mer nöchere üs dere Zahl voller Emotione,
eg wott nech jetzt ned länger verschone.
Was hets also uf sech, met dere Zahl chorz for hondert,
eg be öppe gar ned verwonderet.
Es esch doch klar, das 99-i passt zo öis doch wonderbar'
Was? Der fendet das chli sonderbar?
Eg wott nechs erkläre, es esch gar ned schwär,
öberleget nor emou wie das wär.
Wenn mer normal, so wie alli andere,
ein Februar oder März wörde omewandere.
Mer müesse jo spenne, söscht chönnte mer d'Fasnacht gar ned fiire,
ond wörde ganz schüch ein Hentergrond bliibe.
Om so wie mer der Fasnachtsbruuch z'läbe,
mues me chli chrank si, em Chopf ond ou dernäbe.
Drom säg eg öich eis, loset guet of der Zonft ere Jöngst,
es esch egal öb du besch der äutist, der schönst oder der dömmst.
Egal öb 30 oder 40, houptsach derbi,
Ned ganz hondert muess me si.
