UBS, EHC, und AHV, WEF und BB Show
MFG, GFM, und ÖVP, und SVP grad au
Mir hei vo all däm Blödsinn gnue, und säge euch drum schlicht
Larve uf, ab uf Gass, Mir mache d'Schotte dicht.
Zersch wott si ganz e länge ha und isch au scho ganz gspannt
Denn lieber doch e churze und si nimmt ne grad i d'Hand
Doch dä isch ihre gliich chli z'churz, und au no ziemli chrumm
Dr nöchscht isch z'blass und kläberig, isch das nid cheibe dumm
Sie findet keine guet für sie, isch schliesslech leer wegglaufe
D'Erika Pasquale isch, am Wiehnachtsböimli chaufe.
Aui Spieler si parat, dr Match foht jetz grad aa
Im erschte Spiel vo dr Saison, wott dr FC Vollgas dra
Nur dr Kuoni gsehsch no mit em Goalie diskutiere
Und prompt duet dä bim erschte Schuss, grad es Goal kassiere.
Aus Kandidat für e Ständeroot, isch är ohni Chance gsi
Und au i Kantonsroot z'cho wird nid eifach si.
Sötti denn au das nid klappe, wei mir ihn unterstütze
Und hei ihm drum e Helge gmolt, wo ihm no meh söll nütze
Dr Kantonsrots-Saal, dä isch halb läär, um Himmu-Herrgotts-Wille
Drum wähle mir dr Marcel Wyss, dä würd ne denn scho fülle.
Statt s' Auto, dänkt är, e be schlau, due gschiter s'Velo näh
A das Fäscht, wöu's eventuell chli Alkohol chönnt gäh
Är trinkt es Bier und nomou eis, und het es riiese Fäscht
Noch paarne Stund, es taget scho, wott är de hei is Näscht
Är stigt uf, fahrt ab, gheit ufe Ranze, dass är i Notfall muess
Roger Beck mir rote dir, Gang doch s'nöchscht Mou z'Fuess!
Dr ganz Tag stoht er uf de Ski, das macht ihm eifach Fröid
Zum Schluss möcht är no öppis trinke, wie dir öich dänke chöit
Wo är denn i dr Skibar isch, si sini Ski fortcho
Es het se dusse eine drum, nid mit Absicht gno
Der Chäsi Erwin, rönnt Piste ab, und rüeft: Du dummi Sau!
Gimmer mini Ski doch zrugg, bechunnsch derför mi Frau!
In Oensige wird Grosses plant, die luege för d' Natur
E See sölls gäh, mit Tier ond Pflanze, als Bitrag zur Kultur
Z'Bonige chönnt me das doch au, erhöchet eifach s'Wehr
De hätte mir im Mittelland, es eigets Mittelmeer.
Und i däm Meer, do chönnt me jo, döit emou dradänke
Fulebach und Bonige und Wolfwil drin versänke.
Mit Täsche und mit Ski ir Hand, isch är überall am Sueche
Wo isch dä cheibe Autoschlüssel, jetz foht er afo flueche
Är stoht i der Bettmeralp, vor sim verschlossne Chaare
Drum muess dr Werner Lack jetz haut mit em Zug heifahre!
Liebe Werner, hesch Du bim Packe , öppe e Chappe aa?
Är het si Autoschlüssel drum im Koffer inne gha.
En Esu dä isch störrisch und farblech meischtens grau
Het es luuts Organ doch was är seit isch nid so schlau
Au uf e Chappeler Esuclub, passt die Beschriebig hoorgenau
Störrisch, e luuti Röhre, jedoch farblech eher blau.
Öb är jetz ändlech drinne isch, das weiss är nid so gnau
S'Internet isch kompliziert, und är isch nid so schlau
Und öb är denne drin gsi isch, het är scho lang vergässe
Drum lit au s'Wüsse um sis Chind, nid i sim Ermässe
Und au zu weler Frau är ghört, duet är öppe Mou vergässe
Het dr Boris Becker äch e chli zvöu Rindfleisch gfrässe?
D'Fraue kreische, si ganz wild und döi öis stark bedränge
Bestuune öisi heisse Röck, probiere ständig drunder z'länge
Die Wörkig und dä Sex Appeal setze öis jetz langsam zue
Dehei löi öisi Bränte-Fraue öis kei Nacht meh Rueh.
