E ritterlichi Blitzkarriere, vom Stift zum Bankverwalter
ou Amme isch er gli scho gsi, im jugendliche Alter.
Wenn öise Viggi s'Glück bischtoht,
wird er villicht no Bundesrot.
Ob Gmeindrot oder Boukommission, erscht rächt im Chilegsang,
ou nach der Führwehr plouderet und trinkt me zimli lang.
Wär g'hörsch die gröschti Röhre ha?
i gloube s'isch der Willimaa.
Der Papscht het weue d'Schwiz cho bsueche, es isch bis jetz nid glunge
mir wüsse werum, das isch doch klar, d'Vögu heis aui gsunge.
Er cha öis nid mit eine Bsuech beehre,
solang ihn der Furgler zum Chrischt wott bekehre.
Mit Blauliecht und Sirene, rückt's Biggè wider us.
Me gseht zwar weder Rouch no Führ, was brönnt ächt für nes Huus?
Wär schtellt der Führwehr wider e Falle?
Zum X-te Mol isch's Tennishalle.
D'Regierig schlot vor, der UNO bizträte und chlopfet dört a d'Tür.
Mir aui chöi jetz nume no bätte und schicke der Schürme der führ.
Das macht er scho, das wär jo glacht
das het er drum bis jetz noni gmacht.
England isch e Grossmacht gsi, und aui hei's begaffet.
Die Insle isch hüt nürrane "in", die Cheibe wei nümm schaffe.
Aber mir wüsse wär gschaffet dört het
s isch der Charly bi der Di im Bett.
Bim Bärti bruchsch e Chundecharte, wenn Moscht wotsch für di Chare,
ou d'Führwehr gset me ab und zue zum Tanke häre fahre.
Doch Gmein cha döt jetz nömm go boschte,
wenn haut net zausch, de git's kei Moscht me.
Wenn einisch es Boboli hesch und hundemies bisch dra,
wenn döif im Bett mit Fieber, der Kissling schnäu set'sch ha!
Wenn Schwein hesch und s'isch mou nid b'setzt
heisst's sicher:"Bitte sprechen- jetzt!"
Bi der Wahl vom neue Generalsekretär het d'UNO Chöschte gha.
Das isch doch eigentlich nid ganz fähr, dass si ne nümm wei ha.
Het öpper vo Euch, dass er nid duet roschte
für e Waldheim e schöne fuhle Poschte?
D'Gmeind's behörde planet scho lang, es Bad mit Sportaalag,
wenn chunt ächt das? 0 heitere Fahne, wenn isch dä glücklich Tag?
Als Schwümmbad macht scho e gueti Falle
öisi schöni Mehrzwäckhalle.
