Der J.R. Juing, dä vo Dalles und der Bleek vo Denver,
si im Färnseh scho sit langer Zit die grosse Renner.
Do isch der "Motel-Jörgli-Schneider" zahm, und fähl am Platz.
Nämet doch der Schuelhus-König Othmar Eigensatz!
Bim Abfahrtsrönne frogt e Bsuecher, eine us der Schparte,
wie die das unde wüsse chönne, wenn si obe schtarte.
Dä seit:" Die Zit wird abegfunkt mit Elektronesänder
nur bi de Auschtria-Fahrer schtoppet me mit ein Kaländer.
D'Hägedörfer si im Düfu ab ein Chare gheit.
Es isch e Sorte Lüt voll Schtolz und Uberheblechkeit.
Die hei der Gring höch obe, jo me seit sogar bim Pfunde,
derfür isch halt als Gägegwicht d'Barriere immer dunde.
Der Wahlmänätscher Wiss seit:" Fuli Schprüch das längt hüt nümme.
Hüt muesch öppis biete, wenn die Wahl wettisch gwünne!"
Wenn d'Chinder wotsch begeischtere, denn losch se rösslirite,
Schwarzi Wähler foht me mitere Schou vo Transvestite.
Der Bärti isch z'Auschtralie gsi, das hei mir g'höre säge.
Er chunnt denn hei und macht bim Gmeindhus grad e nöii Schtäge.
Wer het äch do der Fähler gmacht? gloube Du, nei Du!
Wotsch du die Schtäge uf, muesch gumpe wie n'es Känguruh.
Der Pfarrer und die Buebe, wo nem diene am Altar.
Göi all Johr der Europapark go bsueche mit ein Car.
Die Reis die isch für d'Buebe Johr für Johr es Supergschänk.
Wieso goht er is Dütsche use - he zum schmuggle dänk!
Wenn d'Buure ihri Rindli uf ein Bärgli hei plaziert,
de wird no eis a d'Würze gschüttet und ganz schön plagiert.
Chli käppelet goht's hei mit ein Traktor, das isch der Wahn,
denn plötzlech isch de Näfe Urs (hick) uf der Outobahn.
Z'Züri kämpft der Schtadtrot und die ganzi Tschuggerei,
gäge Sumpf und Sex und ou die Kinosouerei.
Si wei das Züg zur Schtadt us ha, das hoffe si, scho bald
doch sit die öisi Luft verpeschte, schtirbt sogar der Wald.zürich
Der Werner schribt sech d'Finger wund, am Oberturnerbricht.
Er schribt es literarisch's Wärch, so ganz us siner Sicht.
Doch a der GV foht er a fo sueche wie besässe.
Jetz het är Gopfrid-Schtotz deheim der Johresbricht vergässe.
Lilian du Schtück vo der Nation, Dir goht's verschisse.
Di ganzi Bandi, inklusive Helmut, het di bschisse.
Anstatt gross politisiere muesch Du De dri schicke,
und - anschtatt Frou Bundesrot, chasch Du jetz lehre schtricke.
