S'Marxe Roland het dr Plöusch am Laschtwage schoffiere,
und duet drum für e Möbu Lack Möbu zum Pfischter füehre.
D'Suhr aber luegt är i lääre Chaare,
är isch drum ohni Möbu gfahre.
I sueche mir en Alterswohnig, mit Swimmingpuul und Sauna,
a Fitnessruum, es Wällebad, das sett si sicher au ha.
Und wenn'i Müei mit zahle ha,
de hilft mer s'Schtalder Silvia.
Die neui Schtross isch noni offe – noni offiziell.
Dr Chambermännli fahrt dört druffe, gliich scho ziemli schnäll.
Är fahrt si Chaare saperlott,
als erschte uf der Schtroos zu Schrott.
Alarm, Alarm - d'Tür isch gschlosse, es muess en Unfall si.
S'Lolli schreits und d'Fürwehr secklet und drückt es Fänschter ii.
Si finde dinn, statt Schreck und Gruuse,
dr Martin Husi im Näscht bim Pfuuse.
Söue'mer ächt oder söue'mer nid, oder söue'mer gschiider doch ?
Vilicht lieber nid oder öppe gliich oder nid äch besser doch ?
Herrgott, isch das e schwirige Fau,
dä Gmeinsbiitrag a Orgelbau.
D'FdP, die schüttlet d'Fuscht, und chnuschtet wäg däm Burscht,
Dä Fuscht, dä nimmt'nis alli Luscht, sis Gfuscht isch doch für d'Wurscht.
Doch wenn's druf a chäm, d'Hand uf z'schtrecke,
gsesch se d'Fuscht im Sack verstecke.
S'nöchscht Johr isch dr EHC, die Schliifi-Boys vo Olte,
dunge i dr Nazi B, wottsch öppis anders b'höupte ?
Eine tuet scho hüt frohlocke,
dr Catti mit de Silberlocke.
Dr Werner Lack het Kunschttalänt, das het dr Gmeinsrot g'ahnt,
und ihn zum Chef vom Gmeins-Usschuss für's Fuscht-Projekt ernannt.
Sithär tuet är, statt d'Fälder z'versoue,
mit ein Mischtstock Kunschtwärk boue.
Norwin Lack, was isch mit Dir? Bisch amme no fliissiger gsi.
Jetz gisch di uf und sig'sch sogar bim Turne nümm drbi.
Hei jo, seit är, dir heit's doch gseh,
i ha drum keini Turnschueh meh.
I muess i dr Stube es Loch usehöue, im Winter drfür meh füüre,
vilicht mis ganze Huus umboue, dusse Wiehnacht fiire.
Z'Chappu gits nämlich, es tuet eim weh,
keini normale Christböim meh.
