Em Reiff Heinz wird's so komisch heiss bim Usflug mit paar Froue,
drum tuet är, zum dr Gring go chüele, e Sprung is Wasser troue.
Nach däm Gump fluecht är wie ne Moore,
rà het drum im Wasser sis Biis verlore.
75 Joor isch s'jetz, si turne ganz in wiis,
alli chrampfe uf das Fescht, voruus dr Werner Wyss.
Är het a däm Tag e gschtresste Poschte,
vor luuter uf's Jubileum proschte,
drum fahrt er z'obe i Gartepfoschte.
Statt Bilder z'moole züchtet är Schoof, vo däm verstöig är meh.
Jetz heig är grad im Friedli Hans e Bock zum Schlachte geh.
Bim Metzge seit denn dr Friedli ganz duuch:
"Em Schaub si Bock het es Lamm im Buuch."
Au z'Olte wird nid ganz genau nach em Bourächt gange.
Das Hammerloch wird teuf und teufer, jetz si si bliibe hange.
Em Stutz isch statt d'Teufi d'Höchi nöcher,
drum wärde sini Hüüser immer wie höcher.
Si boue z'Chappu wie verruckt, es wird eim Angst und bang.
Grossi Chlötz und chlini Hüsli, zäme und usnang.
Dr Schtrub Schorsch setzt sis eigete Böhnli,
und bout es Seilbahn-Schtatiönli.
Gwogti Fahrte, gwogti Flüg, isch Trumpf gse letschte Summer,
mit Auto, Flüger, Hängegleiter - öis macht das langsam Chummer.
Dr Ruscht isch glandet z'Moskau - doch
dr Wage vom Gubler im Gülleloch.
D'Vätere müesse i dr Häfeli-Schuel, us Karton Hüsli boue.
D'Ching hei dr Plausch,wie die Manne chnorze,und au's mit Liim versoue.
Dr'Chäsi-Meier wot sich nid lo uslache,
und loht sis Hüsli vom Schriiner lo mache.
Jä nei, jä nei, mit Bouvorschrifte loht sich nid lo gschpässle.
So het d'Sandmatte z'Bonige gmeint, drbi halt glatt vergässe:
Wär ein Nochber eine wot innebäse,
unei wäge paar Ziegu d'Levite verläse,
ne zwinge, en angeri Farb usz'läse,
dä muess scho chönne es Bougsetz läse.
Im Joor 2027, nach 50 Joor Gschtürm und Schtriit,
wird s'Schützehuus denn doch no bout, es isch au ändlig Ziit.
Wo me's denn iiweiht, chöme kei Lüüt,
wöu's denn gar kei Schütze me git.
Me het im Pfarrhuus plättlet gha, e Wand vo dene wiise,
sooo chrumm – au! - was macht me do ? Schnäll wider use reise.
Dr Niggli seit: "Das isch e Schlag!
Nie me plättle am Barbaratag."
Vo allne Site, unge, obe – so gsei mer`s jedi Nacht
rings um d'Hütte het är drum Lämpli häre gmacht.
Im Bartlome si Belüchtigs-Tick,
macht Konkurränz im Mövepick.
