D' Plättli, d' Böde, d' Feischter glänze, samt ein Gummibaum.
D' Sonderegger's si im Schuss, s Putze isch e Traum.
Dr Alptraum vom Traumpaar, heit ers gseh?
... S'isch jo nur es chliises Träumli gsi ...
Dr Hänsu, dr Mäxu, die beide Beizer, wei zäme dr Umsatz steigere,
Dr Hänsu bim Mäxu, dr Max bim Hans, dr eint wot's ein angere zeigere.
Dr Bööne het dänk doch z'viel gseit,
Jetz het ne der Mäxu zur Beiz us gheit.
Dr Aerni chocht es Hüenersüppli; wie z'Bonige das so isch,
goht är I Beiz und blibt dört hocke, bis zobe am runde Tisch.
Chund är denn hei uf gwagglige Sohle,
isch s' Huehn und Pfanne schwarz wie Chohle.
Nid nume Fleisch und Fisch chasch ha, nei Fäli und au Finke,
Mit Video choche isch jetzt Trumpf: Nudle oder Schinke.
Im Chappeler - Friedli - Ichaufs - Center
Gits sicher gli au Baby - Pamper.
Dr Fuscht isch Architekt und Künschtler; wenn's nach sim Farbsinn goot,
Wär euse Bornblick, gopferdeckel, schwarz und gälb und rot.
Bim Eigesatz gseht's angers us:
Dört hockt e Schwarze im wiise Huus.
Ou, verdammt, das isch e Heisse, do food's dr afo gruuse!
Mit euser Füürwehr got's bärgab, wie chunt äch das no uuse?
Dr Heiri, dr Chef, schriibt Computer-Gschichte,
Dr Wyser, si Vize, tuet Schnitzelbänk dichte.
Z'erscht seit är das,wo-n-är nid wot säge,mit e Huufe schöne Wort,
Denn redt är über das, wo-n-är nid wot rede, derbi wirds langsam spoot.
Und stigt är denn ändlech uf's Thema ii,
Isch dr erscht Auguscht scho fasch verbii!
D'Schildbürger hei - dir könnet die Gschicht - bim Boue d'Feischter vergässe,
Und spöter versuecht, mit Seck und Chüble, d'Sunne is Huus ine z'prässe.
Bim Nützi Max goht's umgekehrt zue:
Aer bout z'ersch s'Feischter und muured's denn zue!
D'Nives Hagmann isch energisch, das zeigt si Tag für Tag.
Was sie seit, wird unterstriche, mit Fuschtschlag, Schlag für Schlag.
Und promt gheit ihre Unterstand
Ueberem Auto usenand!
Dr Minder Heinz macht Umwältschutz, är nimmt sich au bim Wort,
Sis Holz holt är drum z'Hägedorf und das am falsche Ort.
Dr Chappeler-Wald schone, do druf isch är stolz.
Jetz suecht me per Zytig dr Dieb vo däm Holz.
