E nippe a mim Bier und due im Garte usse sitze
Doch plötzlech chunnt es Ross und duet vorne dure flitze
Jetz goht's Richtig Pfarrhuus und dört frissts im Pfarrer d'Meie
Es Ross isch ab – so hebet's doch – ghörsch der Hurter schreie
Es goht jetz richtig Hägedorf, was wott das äch dört äne?
S'Ross lauft und lauft und luegt nümm zrugg, es schüttlet nume d'Mäne
Finds nümm hei oder wotts äch nur d Fälder chli go düngere?
Wotts nur chli ad Dünnere, oder übere zu de Dümmere?
Jetz chunnt dr Stefan Wyser ufem Velo hindedrii
Är stramplet und är chüücht und schwitzt und gseht chli schiter drii
E chumm ned drus, doch isch's egal, e has scho fasch vergässe
E gniesse wieder mini Rueh, und due no öppis ässe
Doch gli scho chunnt der Stefan zrugg und freut sich wie ne Moore
Är het das Ross ar Leine und das gwagglet mit de Ohre
Zwee Polizischte döi im Stefan Wyser s'Velo stosse
Dr eint isch chli und dick, dr ander schlank und ganz e grosse
Eg chume no bis hüt nid drus, werum denn um's Verrecke
Duet es Ross uf der Flucht, sech z'Hägedorf verstecke.
Und wie die Gschicht isch wiitergange, isch öis ziemlech Wurscht,
Mir wei jetz öppis trinke, mir hei jetz nämlech Durscht.
Mi Wiehnachtsboum verlürt scho d' Nodle, stüpfe duet er ou
Jetz muess ne go entsorge, jo, sösch schimpft de mini Frau
So duet dr Röbi Lack dä Baum im Kofferruum iichlömme
Denn fahrt er los um ihn im Hilarifüür z'verbrönne
Bim Schuelhuus macht er grossi Auge, dänkt es isch e Troum
S' halbe Chrützfeld hät er gwüscht doch wo isch jetzt si Boum.
Es Blackout in Amerika und z'Italie au no eis
Z' Chappu isch das au passiert und zwar im Duri Deiss
Är suecht drum Lüt won är chönnt am Jooresafang ehre
So studiert und grüblet är und duet Gedanke chehre
Dr Kulturchef, dä het kei Idee, isch verlo vo allne Geischter
Duri dänk doch a di Sohn, dä isch Unihockey Schwiizer Meischter
Das Joor hani dänkt I loh mi vom Arzt lo impfe
Doch trotzdäm hani Fieber und muess Hueschtesirup trinke
Ig verstoh das nid - dr Stampfli het doch s'rächte Serum gnoh
Doch du blöde chäibe Schiisdräck es isch die fauschi Grippe cho.
Löit bitte öichi Frau nümm use, e Virus isch dr Grund
China het bestätigt, e schlimmi Hüehnergrippe chunnt.
Vo Satellite und vom Mars, ghört me d'Medie brichte
Si alli gspannt und fiebere, was me nöis duet sichte
Gseh chasch nur e Wüeschti vomne Roboter ufgno
Doch die meischte Manne gsäi das jede Morge bim ufstoh
Die gäli Farb, dr grossi Tisch und die nöii Charte
Nach em Facelifting wott s'Frohsinn jetz so richtig duurestarte
Au dr Dani schiient vöu zfriedner öis dunkts drum s'Lisbeth duet
Im Frohsinn und im Dani au eifach richtig guet.
Uf Lääri Dose, Schäärbi und e Gruch nach Seich im Garte
Chöi d'Nochber vo dr FC Bar a dr Chilbi warte
Statt grossi Gitter z'stöue um die Sauerei z'vermiede
Döit nümm zueloh, dass die Bar Frömdi döi betriebe.
211 zo 23, der erschti duet ufschnuufe
180 zo 50, ou der zwöiti chasch no bruche.
140 zo 103, bem drette werds scho knapp,
110 zo 120, die vierti macht denn schlapp.
nochhär chunnt Aues so wie gwohnt, bes zom letschte Maa,
em Gägesatz zor Bränte-Zonft darfs ei Frou em Bundesroot ha.
Si hei dr Wilhelm Täll ufgfüehrt im Löie z'Nottiswil
Und gwüss no niene i naturalistischerem Stil
Mit Helebarde und Culisse git's e Schlegerei
S'mischt jede mit ber einte oder andere Partei
Jetz chöme Gläser z'flüge, jede stillt si gheimi Wuet
Es chrose Tisch und Bänk und s'Bier vermischt sich mit em Bluet
Doch das isch alles nüt vergliche mit der Schlacht wo droht
Im Vorfäld vo de Wahle för öise nöie Bundesrot
Wenn z' Chappu chöiflechi Liebi suechsch döi mer dir aaroote
Pass guet uf du chöntisch drom ane fauschi groote
I der Bobst Luciana ischs nümm ghüür - se isch ganz perplex
Das Plakat a ihrer Wand wirbt für ne Stuehl und nid für Sex.
Si Körper heisst Adonis und är bhautet sich au fit
Und au bim Ässe luegt är druf, dass' jo kei Ranze git
Är macht vöu Sport und ghört im Hockey öppe zu de Beschte
Und wenn si siege gsehsch dr Andi Lack au öppe feschte
Doch nach em Fescht im Frohsinn settsch för hei nid s'Auto näh
De muesch au nid wäg 100 Meter s'Billet go abgäh.
Deutschland sucht den Superstar, das wüsst der sicher au
Und d'Schwiiz suecht jetz dr Musigstar, dasch mega-toll, mamau
Dr Alex Heim suecht Wählerstimme, das isch au nümm nöi
Und d'Metzler suecht e nöie Job, und d'ESA suecht dr Beagle2
Chappu suecht der Supernarr, si aui scho parat,
Und der Dünnere Dinu isch öise Spitzekandidat.
