Johr für Johr / die glichi Gschicht / mir si se n'afe gwöhnt.
Und hebe einfach d'Ohre zue / bis ändlig besser tönt.
Söiborschte si / isch halt kei Schigg,
bim Fritz sim Melodie-Tigg.
Bränte-Zunft / und Bränte-Wiibli / und nomol Bränte-Zunft;
Zwüscheduure Gmeinsverwaltig / und wieder Bränte-Zunft.
A däm aa gsesch / das isch e Hit !
Wär de ne uf ein Maage liit.
Bilder chlaue / ha ha ha / die Bilder chasch nid nee;
Die Helge vo de Niggeli / die het's doch gar nie gee !
Z'erscht muesch Bilder chönne mole,
bevor ne Dieb se cha go hole.
A jedem Fez a jeder Fiir sig's z'Obe, sig's am Tag,
bim Defilee bi'dr Bacheröffnig am Altersnomitag
Chasch s'Käthy, s'Hanni, s'Valentine gseh,
Im Gmeinroot sis fliissige Feschtkommitee!
Si wärbe viel verteile Gschänkli schicke Gönnerbriefli,
Wo se triffsch bechunsch ungfrogt e Hampfle grüeni Chriesi
Mir roote'n euch:" Töit nid zviel neh,
Schoorniggeli gäbe Ranzeweh!
Am Turner-Unterhaltigsoobe isch's Thalmann Silvia do,
si gigelet und däderet, und luegt de Manne no.
Und während äs am Schnädere isch,
bediene sich d'Lüüt am Tombola-Tisch
Jetz bin'i beruehigt und ha kei schiss, die Rächnig got jetz uf
Dä Schutzruum isch e tolli Sach, scho jetz freu'i mi druuf.
Si hei mer drum zueteilt - ei, ei, ei,
es Meitschi mit länge schlanke Bei.
Scho fasch e ganzi Stund got's jetz, die Vernissage vom Grütter.
d'Lüt wei ändlich d'Bilder gseh, dr Redner schnuret wiiter.
D'Gsichter wärde bleich und chäsig,
bim Peter Heim sir Dichterläsig.
Dr Amme wot scho zämme rume, und d'Gmeinsversammlig schliesse
d'Lüüt stöi uf und wei scho go, es Bierli no go gniesse.
Päch gha! S'isch no nid Füürobe:
Dr Willima wot no öppis froge.
Im KTV, im Zirkus Knie, i dr Füürwehr isch er au.
A dr Chilbi molt är Chindergsichter, zäme mit dr Frau.
Läck du mir, isch dä im Schuss,
Dr Galgevogel Wyss Markus.
Dr Möbu Lang, dä isch bankrott, dr Viggi Meier au.
S'Regina macht dr Lade zue, s'Gschäft isch hert und rauh
Mir wüsse, werum das soo schlächt lauft:
Dass isch, will dr Böne Schueh verchauft.
Dr iisig Vorhang isch jetz wäg, dr Oschtblock isch jetz off.
D'Perestroika isch jetz in, s'Wärk vom Gorbatschoff.
I dr Oschtschwiiz nur, so quasi,
wirkt wiiter im Bischof Haas si Stasi.
"Für'ne offni Politik" het d'FDP do gmeint,
Dä Fläscheöffner het's in sich, ganz chappu chnorzt vereint.
Probiersch und glaubsch, sigsch jetz scho bsoffe,
statt d'Fläsche hesch plötzlich d'Finger offe.
Häcksle, häcksle, häcksle, häcksle; är het scho langsam Träum.
Dr Vögeli Heiri häckslet alls, Büsch und ganzi Bäum.
Häcksle isch ebe si grosse Traum,
drum Schlot är, wenn's si muess, e falsche Baum.
Im Appezäll do isch's verbote, das Wörtli isch nid do.
D'Zensur got jetze ganz hert vor, mit däm darf gar nid cho.
Doch wird's vom Bundesgricht zueglo,
das Wörtll, das heisst nämlich: "Jo!"
