Z'Chappu git's e neui Musig, e Gugge dasch ned schlächt,
Mit Pauke, Hörner, Pfyfe, Deckle mache si's ganz rächt.
Bem Feschte und bem Umehocke müesse si sech sputte,
Sösch wärde si haut nie so guet wie früecher einisch d'Nutte.
Blabla blabla blabla blabla blabla blabla bla bla,
Lala lala lala lala lala lala la la.
Wär lallet do der ganzi Daag im Frohsinn dört im Egge,
Es si es paar so autosexuelli Biirewegge.
"Werum hei mir die ganzi Zyt es Näbuloch vorus ?
Und werum löit dir bim Gmeinshuus d'Johreszahle us ?"
Verchauf doch Wiehnachtsbäumli, statt de Zahle noche z'laufe,
Und Studer Urs, wetsch du ned bald e Brille für Dee chaufe ?
Z'Chappu im Seniore-Huus, si d'Lüt no purli-munter,
Nüt vo chlöne, nüt vo chnorze, isch das ned es Wunder,
Se jasse, jodle, singe, feeze, schwinge ihri Bei,
Dr Otti, s'Heli und Konsorde, mit em Markus Frey.
Alles chlöhnt wegem EWR, bsunders der Jean-Pascal,
Le "Alleingang" bringi nur Arbeitslosi, et ca c'est très fatal.
Nur d'Bally lacht und seit ganz troch "Lueget öis doch zue,
Mer verchaufe jo i zwe drü Stund duusigi vo Schueh !"
Vo däm Füürli ganz entflammt, dänkt sich der Herr Villiger
Das mach I au, im Dütsche si doch d'Velo sicher billiger.
Stüüre zahle das isch schlächt, do het är afo dänke,
En Initiative wär grad rächt, de chöi mer das scho länke.
Lieber luegsch für e Banke-Gwünn, die z'Solothurn si depp,
Das isch öppe s'Gedankeguet, vo öisem Bachme Sepp.
Bim Spatestich, am Aelplerfescht, ar GV vom Verein,
Im Verwaltigsrot vo der EKO, läck het dä es Schwein,
Am Bastian e grossi Schnore über öisi Schwiiz,
Im OT Brichtli, Föteli, au dört het är si Sitz,
Be dr FdP isch är der Chef und au i siner Gmein,
Z'Olte isch är au verträte, im Förderigs-Verein,
Am Stammtisch vo der Schmidli Lise gseht me ne schint's au,
Dä Ständerot, wo ledig isch, däm fählt doch eifach d'Frau.
Schildbürger het's i öisem Dorf, dir chöit das alli glaube,
Im Summer hei die sicher scho ghirnet uf der Laube,
E Ghüder-Chlauer dä goht ume mitte i der Nacht,
Drum hei si jetz, dass niemer chlaut, e Hag drum ume gmacht.
Tschutte, tschutte, tschüttele, am grosse FC-Fescht.
Jede secklet wie verruckt, jede isch der Bescht.
Plötzlech chunnt e Dirigänt, dä trifft ned mou der Ball,
Dr Lämmli Röbi torklet ume, het är äch d'Lampe voll ?
D'Russe hei gar grossi Sorge mit der Marktwirtschaft,
Doch d'Boniger Schnägge, die Sibesieche hei d'Lösig ändlech gschafft.
A ihrem Buure-Märet, dräit s'Käthy Brönimaa,
E ganze Späck, du glaubsch es ned, em gliche zwöimol a.
Wär lauft denn do dur's Dorf derab, wär chönnt denn das wohl si ?
Dr eint vorus, die andere ganz artig hindedri.
Es isch kei Prozession und au kei Fasnachtsumzug nei,
Es isch dr Dani Wyss, är goht zum Metzger mit de Söi.
Sie hei der Willhelm Tell ufgfüehrt, doch hür ned z'Nottiswil
Und gwöss no niene i naturalistischerem Styl,
Im Bundeshuus bem grosse Bild vo öisne Eidgenosse,
Hei unterhalte s'Publikum und uf d'Regierig gschosse,
Dr Husi spöut der Willy Tell, es chönnt's wohl keine besser,
Ganz allei - gäge 300 Millione - bösi EG-Gessler.
