"Du Heiri", rüeft ihm s'Beatrix, chumm doch jetz goht's ruch.
Är hebt sis Rohr und schreit se a: "Schtoh nid uf e Schluch !"
Sie chrampfe, schreie, schtöhne, küche, chöme ganz is schwitze,
Der Druck isch gross, der Schluch wird härt, är cha jetz de grad schprütze.
Was lachet dir, das isch kei Porno, au kei dummi Gschicht,
Sit letscht Joor isch für beidi Gschlächter Füürwehrdienscht e Pflicht.
I dr Guggemusig het är e z'grossi Schnure gha,
Und i öisem Gmeinrot isch är nume Ersatz-Maa.
Dr Misteli dä het jetz plötzlech Ziit zum versoue,
Und duet i siner Garage - Verkehrs-Beruhigigs-Männli boue.
Dr Lenzin Stefan meint: "I zahle dir e nöie Chaare",
Zu irgend eme Autorowdie, wenn är dört dri würd fahre,
"Zerscht machsch e Tescht bim Schützehuus voll gradus i d'Wand",
"Und nochher chunnsch und nimmsch mi Windfang dört am Schtrosserand."
Mir arme Männer chöme drunter, vo all dene Emanze.
Sit däm Joor duet sogar im Bundesrot so eini tanze,
Der Gipfu, isch mir möi jetz au im Schlof scho afo bange,
und jede Morge luege, öb är au hüt no döigi hange.
Grüezi, isch do d'Polizei, chömet schnell verbii,
Si hei mir vori s'Velo gnoh, das cha jo fasch nid si."
A dr Wiehnacht z'obe schpot lütet s'Chrischtchind a,
Du Ruedi Brönimaa, chasch di Göppu wieder ha.
Liebe Hodgson wi wisch ju alles toy toy toy,
Best of luck und chömet bald als Schwiizer Helde hei.
Mir wünsche öis dass dir döit d'Schwoobe usechutte,
Aber pliis, pliis, pliis, lo der Egli nid lo tschutte!
Z'Chappu isch politische Früehlig, der Winter isch furtblose,
Es blühe gälbi Ankeblüemli und nätti roti Rose,
Au schwarzi Chäferli chasch gseh, nur ei Farb isch nid klar:
D'Autopartei, isch mängisch blau, doch meischtens unsichtbar.
Nach der Turnschtund göi es paar zum Christoph Wyss go flueche,
"Si hei öis s'ganze Gäld wäggnoh, es paar so dummi Rueche !"
Är schimpft: "Worum heit dir's de i dr Garderobe gloh ?"
Doch wo är wott hei go, isch au si BMW furt cho.
D'Chilbi z'Chappu isch e Hit und das scho sit viel Joore,
Si füehrt jetz au im Winter scho zu Spott und heisse Ohre.
Die einte wei se jetz verschiebe und die andere nid,
Dass sie i de nöchschte Joore a der Dorfschtross liit.
Mir schlöi öich beidi Standort vor, dr Chilbi duet das wohl,
De hätt's me Beize und zum Suufe gäb's me Alkohol.
Zerscht turnt der MTV sich fit, sicher guet zwe Schtund,
De hocke si im Frohsinn in und biige Pfund um Pfund.
Do plötzlech chunnt der Minder Heinz, är muess zerscht immer hei,
S'Esti goht drum gli is Bett und duscht nid gärn elei.
Falschi Münze präge, cha doch jedes Chind,
Uf der einte Siite Zahle, uf der andere e Grind.
Au mir hei gfäuschti Föifliber, säget's nid im Koller.
Uf em Schwarzmärt hei sie scho e Wärt vo mindestens 30 Dollar.
