Dr Kissling Michi fiirt sis Hochziit mit Trari Trara
Aui si schön useputzt, hei nume s'Beschte aa
Nach dr Chile wartet d'Gsöuschaft uf nes Tschu Tschu Bähnli
Dr Zug fahrt ii, zieht hinter sich vom Rouch es dunkus Fähnli
Ruessig si si, dräckig vo de Zeche bis zum Chopf
Go wäsche möi se sech dehei, si das nid armi Tröpf
Nur be Zweene gohts nid ab bim schrubbe, s'chläbt wie Harz
Dr Kissling Peter und dr Eigesatz, die bliibe schwarz.
Dr Cornel und d'Viktoria döi uf dr Linde beize
Das gfaut de Boniger denn die jungi Wirti duet se reize
Dr Schenker Pauli gsesch fasch Dag und Nacht um d'Wirtschaft loufe
Das hört de sicher plötzlech uf sobaud si Vorhäng choufe.
1, 2, 3, 4, 5, 6, 7, 8, 9, und 10
11, 12, 13, 14, 15, hundert chönnt das gäh
Dr Linde Brünu seit: e chrampfe nümm, ha gnue, jetz längts
Är zöuht jetz nur no Flöige uf dr Mischtstockresidänz.
D'CVP und d'FdP und d'FPS döi jasse
Si sueche eine möglichscht farblos und doch nid e z'Blasse
Denn ohni Amme giengs öis schlächt vor däm hei mer öis gschoche
Eine het dr Broote gschmöckt, dr STÖCK - WYSS dä het gschtoche.
Snowboarding and Rollbrätting and Tschäppuchäppli träge
Amerikanisch esch jetz "in", das muess me Öich nümm säge
Nach däm Trend duet dr Linus Lack ou a dr Wiehnacht handle
Und sini Bude z'Bonige is Disneyland verwandle.
Ufe abe links und rächts döi d'Männerturner gumpe
Si wei sich a dr Turnerunterhautig ned lo lumpe
S'hed nume eine es Problem, är hüpft immer z'früeh
Bem Seiligumpe hed dr Pius Bobst haut no chli Müeh.
Dr Cesar Keiser, dr Gerhard Polt, s'Cabaret Marcocello
Spiele z'Oute ihri Sketch und das piccobello
Doch jetze hei si Konkurrenz, Du muesch nur is Gäu
Es choschtet nüt, es het no Platz, dass aui ine chöi
Hallihallo, hereinspaziert, zu de Chappeler Cabaret - Tag
Si si berüchtigt und berüehmt, s'git drüber mängi Sag
Jetz goht's nömm lang es foht gli aa, aui si scho rammlig
S'Theater wo do aagseit esch heisst Chappeler Gmeindsversammlig.
Wo s aafoht schneie merkt dr Wyser Wauti ganz verschrocke
Sis Outo het kei Winterpneu, das hout ne us de Socke
Do nimmt är si Traktor, är dänkt är sig e ganze Schlaue
Nur het's ne i dr Dachsmatt ines Outo ine ghoue.
Am Schiweekend do isch är nur echli zwöud abe cho
Denn si d'Latte chrumm är frogt sich: Hei si jetzt ächt gloh?
Dr Schürch Bruno leit ufnes Gleis sini chrumme Schi
Und chlopft druf ume zum se gräde bis si broche sii.
Psst, Der müesst jetz ganz
schtöu si und mer döi schöner singe
Dass hüt öisi Schnitzubänk ganz wunderbar döi klinge
Vom Männerchor und Musiggsöuschaft hei mer drum d'Idee
Vo dr Fasnacht 95 e CD use z'geh.
