E rächte Unternähmer, dä isch Tag und Nacht im Gschäft
Immer fliisig schaffe muesch, süsch gohts im Lade schlächt
Bis Fischers loufts grad umgekehrt, zum Paula sinere Wuet
Immer wenn s'i d'Ferie goht de loufts im Lade guet.
Kunscht isch öppis subjektivs, drum isch das Bild do / schön
Kunscht isch öppis kreativs, drum isch das Bild do / schön
Kunscht isch öppis wo ou chli vo Härze setti cho
Säg, Schaub Thomas wettsch du nid mou diis Härz uuswächsle loo
Im katholische Turnverein ghörsch dr Wyss Ernst brummle
"Mir göi das Gäld für s'Frouehuus am Bättag nid go sammle.
Die Froue söue säuber luege, öis goht das nüt aa
Dr KTV wird sowieso e Platz im Himmu ha."
I d'Wohnig chöme jetze no drü grossi Bäder dri
Jo dr nöii Pfarrer muess e ganze suubre si
Nume öppis isch för öis es bitzli schwär z'verstoh
Loot är sini Möbu doch am Barbaratag lo cho.
Dr Tschui meint: "mit em nöie Pfarrer chöi mer jetz plagiere
För ihn hei mer extra s'Pfarrhuus ganz lo renoviere."
Sogar e nöie Balkon hets, wo är sim Amt cha walte
Und de Chüe und Schööfli hingerem Huus e Predigt halte
Innovativ wie d'PTT hesch no kei Firma gsee
Drum zahle mer im 96 für d' Briefe wieder mee
Doch dasch ned gnue zum Gäldverdiene bliibe si jetz dra
Sit churzem chasch du uf dr Poscht dr Blick und Glückspost ha
Dass sech nöchschtens no mee Lüt a Schauter döi verloufe
Wott dr Müller underem Tisch no Sexheftli verchoufe.
"S'esch Musigfescht do muess e dänk mit der Fahne go!"
Seit s'Näfe Vici, hockt is Outo, esch uf Biberist cho
Dört sitzt är denn i Flösserhof und wartet 4 5 Stund
Die andere warte z'Deitige bis Ihre Fähnrich chunnt.
Duss isch's heiss, es isch August, me chönnt es Bierli bruuche
Nur dr von Arb Stefan duet si Guggemusig schluuche
Si üebe Tag und Nacht und si am Schluss ganz ufem Hund
Z'Oute för'ne grossi Show, wo live am Färnseh chunnt
Doch vor däm Uftritt rüeft dr Stefu: "Jetz hei die öis lo hange
S'Färnseh isch mit Sack und Pack scho längschtens wieder gange."
1 Orgasmus, denn e zwöite und am Schluss sis drei
Dr ganzi Oobe loufts eso, si hei scho weichi Chnöi
S'Sonderegger Sylvia kreischt: "I wott no mee!"
Und s'Schefer Irene seit: "Chasch mer ou no eine gee!"
"Esch das guet", seit als dritti, d'Christa Bartlomé
Bis zum früeche Morge hets no mängi Rundi gee
I öiser Bräntevilla hei se sech amüsiert
Und drzue Orgasmus - Drinks am Meter konsumiert.
Vo de Büchse s'Bläch und s'Altglas döi mer akzeptiere
Der chöit ou s'alte Oel bi öis im Wärkhof deponiere
Nur eis chasch gmäss däm Flugblatt ned, seit dr Ulrich troche
Dr radioaktiv Abfau muesch haut säuber go verloche.
D'Stüürerhöchig isch jetz "in" und bruucht ned vöu Muet
D'Gmeinrööt dänke hin und här dasch ou en aute Huet
Dr Amme meint: "Mir sänke d'Stüür, döi nömme so vöu zahle
Und wenn's de schiefgooht si de irgendeinisch wieder Wahle."
So ne Zirkus, so ne Zirkus, was e so passiert
So ne Zirkus, so ne Zirkus sit der interessiert?
Die ganzi Gschicht vom Charles und so z'England im Königshuus
Und bem Michael Jackson chunnt me ou scho lang nömm druus
E nöie Bundesroot wird gwählt heit der dä Zirkus gsee?
Und z'Oute git's ne jetz de nömm: öise EHC
So ne Zirkus ume Bischof Vogel dä isch rammlig
Doch der allergröschti Zirkus bliibt öisi Gmeindsversammlig.
