Die vergässne Note löi im Lämmli Röbi gar kei Rue
Chum isch är z'rugg im Schuelhuus inn, g'schplüüst dr Müller d'Tööre zue
Är goot uf's Dach, denn s'Tannli ab, und flüügt bis z'underschund
Är wird dr erschti Tarzan sie, wo vo Chappu chonnt
Letschhin hei mer d'Anita Kunz gseh dur d'Strosse springe
Was isch, was machsch, wo bisch Du he? Ghörsch's i de Gasse klinge
Si secklet, chücht, und rüeft und sucht, jetz isch Sie ganz kaputt
Ihre isch drum s'Chind dervo, und zwar füdliblutt
Die nöii Buessverornig macht dr Staat zum Grossverdiener
A öiser Chilbi het sichs s'zeigt für aui Fauschparkierer
Dass öisi Gemein au e chli vo däm cha profitiere
chönnt d' VDK vor Polizei no 10 % kassiere
Am Chlausewettkampf vo der Jug, si d'Vättere go schwitze
Und nachhär se sie no chli i dr Linde bliibe sitze
Ihri Froue wärde ungeduldig, findes nöm zum lache
Si hei drum spöter zäme no es Fondü wöue mache
Dr Enzo seit zum Esti los chasch jo afe goo
Dr Walti meint zum Edith hee! Lo mi no chli doo
Si süferle und süferle, hei es bombe Fäsch
Und am sibni z'obe göi si ohni z'Nacht is Näscht
Es Huehn das flügt dervo, wenn ihm dr Chopf abghaue wird
Es gitt e riise Souerei, s'wird aues Bluet verschmiert
Drum Edgar Hutter due doch ame bitzzli meh studiere
De müestisch Du jetz nid dis ganze Bad lo renoviere
Z'Boninge uf der Autobahn het's krachet wie ne Moore
E Tanklaschtwage isch umkippt, het's ganze Öl verloore
Jetz chönnt dr Schönau Eduard, so chunnt öis zu Ohre
Statt uf sim Platz Palett verbrönne, nach däm Öl go boore
Fücher hei doch d'Männerturner immer öppis zeigt
Doch s'letscht Johr, a dr Unterhaltig hei si chli verseit
Denn sit däm Uftritt uf dr Bühni wüsses au d'Expärte
dass Rinderwahnsinn au uf Säugling übertreit cha wärde
Tempo 30 im Wohnquartier und 50 im Dorfvercheer
Blumechöble, Strosseschwöue, das brämst dis Auto sehr
Z'Chappu isch das aues anderscht und d'Würkig riesegross
Denn s'Nicke Brüder stöue d'Auto chrüz und quer uf d'Stross
Öber d'Gmeinsversammlig hei mer färn es Värsli gmach
Öber das sinnlose Gstürm und Dir heit drüber glacht
Theme hätte mer au hüür gnue zum Värsli mache
Doch langsam finde mer die Sach isch nömme so zum lache
Jogurt, Bommfrit, Serwala, Albdraum und Guafför
Ketschöp, Nessessär, Füsik, und z'letscht no der Schofför
Gross wird chli und chli wird gross, und s' fausche isch jetz richtig
Und aui Regle wo mer glehrt hei si jetz nümme wichtig.
Öis isch nüt me klar doch leider gsehts haut jetz so us
Be dr nöie dütsche rächtschribig chonnt kei Sou me drus
D' Chappeler Chilbi isch e Hit und das immer weder
Z' mitts im Herbscht do gspöre d' Lüt dr Früehlig i de Gleder
Me gseet se schnuure, feschte, suufe, lalle, torkle pfuuse
Und s' Mäders i der Bräntevilla ganz verliebt bim schmuuse
