A dr Tour de France im 98i het's en Eclat gäh
Me het bewiese, dass vöu Fahrer Doping döige näh
Wenn's bim Värsli-Brünzle Kontrolle gäb, wär das för öis hert
Mir wäre denn im nöchschte Joor för's Schnitzubänkle gschperrt!
S'Ziel vor Wärbig das isch klar, die söu öis animiere
und i öis e Luscht erwecke, um Ware z'konsumiere
Nur d'Gewa-Wärbig vom letschte Joor chöi mir eifach nid kapiere
Zu was söu öis im Vögeli Heinz si Gring äch animiere.
Sit langem scho gsehsch jedi Nacht Liecht i ihrem Chäuer
Sie schütte Pulver i nes Fass und rüehre immer schnäuer.
Dr Brauermeischter Martin Rippstein duet flotti Sprüchli chlopfe
Si erschti Gsell dr Adi Wyss mischt Hefi, Mauz und Hopfe.
E grosse Vorrot vom eigne Bier glingt ne nit ufzboue
So schnäu wie die döi suufe chöi die gar nit säuber broue.
Was isch au mit em Kuchta los, froge sech ei Morge
D'Nochbere, denn d'Düür isch off, sie döi sich um ihn sorge.
Är isch uf Düütschland hets Riise gha lot Düüre off lo stoh
Het är am Obe vorhär äch chli z'vöu Viagra gnoh.
Vittel, Perrier und Evian und Source de la Camargue,
Das si aues weltberüehmti und nobli Wassermarke.
Dr Sigi Meier dä hets dunkt, das chönnti är doch au,
Füllt d'Pfläsche ab für d'Iiweihig vom Reservoir Nöibau.
Leider hets dört z'weni Lüüt, är bliibt uf de Fläsche hocke,
Doch en ächte Sigi Meier cha das nid öppe schocke.
Denn mit em Räscht chönnt är dr ganzi Wältmarkt überschwemme
Und derbii sis Wasser Eau de Reservoir benenne
Am Frohsinn Stammtisch hocke zwee, und gröhle ziemli schräg
Nei, "singe" chasch dämm nid grad säge, die si dänk nümm so zwäg
Drum: wenn dr Dani letschti Gäscht wott us dr Beiz spediere,
Duet är dr Mangarelli und dr Kuoni engagiere.
Dr Hueber Andy - dä vom Füler - wott i d'Ferie goh
Uf Mallorca, bim Ballermaa, so richtig d'Sou abloh
Am Flugplatz bi dr Gepäckkontrolle wei s'ne nid lo goh
Dä Glüngi het im Handgepäck drum s'Bajonett mitgnoh.
D'Claudia Bär die isch nervös me gseht er es grad aa.
A dr Turnerunterhaltig muess haut jede dra.
Sie schwitzt, sie putzt, macht Fläsche uf und chrampft sich eine ab.
Au uf dr Bühni macht si mit, aus Vampir us em Grab.
Plötzlech lütet dr Düggeli a: "Jetz wart Eg scho sit Schtunge"
"Di frösch kaschtrierte Moudi isch gäng no be mir unge."
I dr Linde bim Seiche bim Pissoir zue, nach em Bierli i dr Beiz.
Packsch ne us, wotsch afo, findsch ändlech Rueh, für ne Maa het das si Reiz.
Doch luegsch gradus vor De a d'Wand, do chasch fasch nümme seiche.
Jacqueline, Büttiker, Nick und Fürst wär söu do no chönne breiche.
Z'Paris e Brugg, z'Berlin dr Riechstag und z'Basu es paar Bäum.
Dr Christo dä Verpackigskünschtler macht in Stoff verpackti Träum.
Wotsch ihn au mou uf Chappu hole, muesch e guete iifau ha.
Das bringt Prestige und no meh Chohle und zieht so mänge aa.
Mir chönnte öise Amme biete für ne nöie Künschtlerakt
E ächte Dünnere-Dinu-Saurier het dä no nie verpackt.
Dr Koller und dr Cotti hei jetz demissioniert
Zwölf Joor si lang, s'sig ändlech Ziit, hei sie argumentiert
Doch dene blasse Bundesrööt, het's nid wöue glinge
Dass mir emou über sie e Schnitzubank chöi singe.
Am Morge früeh so gäg die zehni gsehsch ihn is Büro fahre
Es Auto - eis wie Zuhälter hei - e richtig tüüre Chaare.
Erscht wo's schneit so richtig heftig lot är si Chlapf lo stoh.
Sis Budget het haut Winterpneu eifach nümm zue gloh.
150 Joor äSBB, die ganzi Schwiiz duet's feschte
150 Joor Bundesstaat, das Fescht isch nid s'beschte
Doch jetz chunnt's besser - dasch d'Superlative - denn gäge jedi Vernunft
Fiire mir im 99i 20 Joor Bränte-Zunft.
