S'nöie Fasnachtsmotto heisst Spieglein Spieglein an der Wand
Me frogt sech wär isch äch dr schönschti Naar im ganze Land
Wär het die schönschte Koschtüm aa, wär cha am beschte dichte
Mir sääge s'nid, mir dänkes nur mir wei öis nid verpflichte...
Aus stolze Beizer us öisem Dorf loht är sich's ned lo näh
För sini tröIe Chappeler Gescht nume s'Beschte z'gäh
Chrüz Wirt Peter mir schätze das wei Dir drum öppis schänke
Es Bild wo gsehsch wie öisi Fahne richtig settsch ufhänke
Vor ein Spiegu duet dr Furrer Franz sich zersch emou frisiere
Und nochhär gsehsch ne stolz und stramm für d'Kamera posiere
Zersch sitlech mit sim Gwaltsprofil und denn au no vo vore
Konzentriert probiert är jo ned i dr Nase z'boore
D'Bruscht voruse, s'Födle spanne, ei Arm vore eine hinde
S'Rosi chunnt nümm usem Stuune, duet das erotisch finde
Liebs Rosi mit däm Apparat chasch no mängisch drücke
Die Foto chöi ohni Film ganz bestimmt ned glücke
Mit Lippestift und Wimperetusch und Make-up hesch se gseh
I dr Glückspost als Modäll, e wohri Beauty-Fee
Doch wenn denn d'Helen Stampfli triffsch, mits im Dorf am Jogge
Isch s'Schönschte a däm Aablick ihri Dalmatiner Dogge
Är chlopft a d'Tüüre, denn a d'Fänschter, ganz heisrig ghörsch ne schreie
Bin i allei, isch niemmer do, wo mi chönnt befreie
Dr Flury Röbi verlüürt dr Muet und tönt scho ganz verdrosse
Irgend so ne Löu het ihn id'Chile ihne gschplosse
Vom Pfarrer Hurter use glo seit är ganz ergriffe
Jetz hätti i dr Not fasch müesse ine Egge schiffe
Dr Dräck wird immer tüürer, d'Sackgebühre die döi stiige
Drumm duet dr St. Urse Wirt si Container voll biige
Wo d'Abfuehr chunnt do isch dä z'schwär, drumm löi si ne lo stoh
Dr Edy schnappt ne und rönnt los, de Ghödermanne no
Bi ihne denn verhandlet är, wott sii mit Bierli locke
Doch das überzügt se nid, si löi ne uf sim Ghüder hocke
Für d'Renovation vo dr Chappeler Chile bittet me um Spände
S'Chappeler Folk, das duet folge, und schöpft us volle Hände
Au z'Dütschland spände si Millione für e Helmut Kohl
De Schwarze ischs landii, landus eifach e chli z'wohl
E rächte Spitzesportler hockt uf s'Velo zum go poschte
So sparsch Bänzin und machsch kei Dräck und duesch au nid liroschte
Edith Hunkeler pass s'nöchscht Mou uf, due d'Täsche guet verstoue
Wöu - wenn's dr se id'Speiche nimmt duets di uf d'Schnuure haue.
E nassi Stirn, geballti Füscht, und Schweiss under de Arme
E rote Chopf, füechti Auge, me het scho fasch Erbarme
Das isch ned dr Polo Hofer, wo mit dr Bänd duet rocke
Dasch nach dr Wahl vom Bundesrot dr Blocher wo duet bocke
Im STV git's Traditione, wo döi useraage
Am Skiweekend uf dr Pischte de Hääsli nochejage
Und derzue paar Kafi Schnaps, das git es riese Fäscht
Z'obe nimmt me d'Ski i d'Hand, im Bähnli hei is Näscht
Am nöchschte Taag ab uf d'Pischte, me duet sech d'Ski aschnalle
Bi eim goht's ned, sis Flueche duet s'ganze Tal durchschalle
Bim Schulthess Stefan wei die Schueh ned i d'Bindig go
Är het am Obe vorhär drum die falsche Ski mitgnoh.
Wenn Du vor ein Spiegu stohsch und dänksch, Du arme Tropf
Hesch e Ranze, chrummi Bei, und Strähne uf ein Chopf
De hei mir dir e guete Rot: Lueg mou dr Gölä a
Mit däm siner Visage wärsch no drüü Mou Schlächter dra!
D'Anita Kuenz, die wott fürs z'Morge, zum Beck go Weggli chauffe
S'isch schampar früeh, drum isch si z'fuul, schnell ume Egge z'laufe
Mit no ganz verchläpte Auge hockt si i ihre Chaare
S'Zündschloss sueche, denn no s'Licht und scho cha si abfahre
Do polterets und chlöpfts und tätschts und sie rüeft - ou verdammt!
Jetz hani i dr Dümmi in, dr Töff vom Nochber grammt!
Dr Büttiker Rolf dä het mit sine Hoseladegschichte
För ne riese Rummel gsorgt, s'duet jedi Ziitig drüber brichte
Doch öis isch dä sympathisch denn das macht ne kompetänt
Das wär doch in Amerika e super Presidänt!
