E rächte Brocke schtoht am Schalter
der Gsöueli der Gmeindsverwalter,
er inweschtiert und balangsiert mit öisne liebe Schtütz
wenn er der Schtumpe mou verlüürt, denn flügt er glatt uf's Chrütz.
Der Böhne-Hänsu seit:" Dasch klar,
i ha ne Umsatz wunderbar!"
Fäudschlösslibier das isch haut guet und s'Frohsinn brucht e Huufe,
doch duet der Beizer schiint's das Züg, am liebschte säuber suufe
Häsch no Schtütz? da Schint dänn d'Sunne!
so redt me schiint's da Züri une.
Am Sächsilüte hei die Trottle wäg der Summerzyt,
am föifi scho der Böög verbrönnt. Das goht eifach z'wit!
Zwe alterndi Politschtratege,
döi langsam, langsam rückwärts schtrebe.
S'Marxe Ruedi und der Nori putze langsam d'Houe,
doch wöu si d'Nase glich wei drinha schicke si jetz d'Froue.
E Gratiswurscht, traritrara,
chasch z'Chappu am erschte Ougschte ha,
und wenn mer s'nöchscht Johr wei es richtigs Ougschteführwärch gseh,
müesse mir der Chrüzwirt-Pouli is Schuelhus abe neh.
D'Wähler vom Bezirk vo Oute,
chöme drus, das döi mir bhoupte.
Nach der Schlappe z'Chappu hätti d'Lisebeth kei Brot,
doch die andere hei si gwählt, i Verfassigsrot.
Im Färnseh gsesch Emmanzefroue,
und d'Teissier duet i d'Zuekunft gschoue,
und öppe einisch chasch ou gseh, wi d'Fixer sich düe impfe
der Schönherr aber gsesch jetz nie me, andri Arschloch schimpfe.
Mit öisem Sepp, däm brave Maa,
hei mir e guete Amma gha,
Jetz lot er leider wäg sim Härz im Gmeindrot sich nümme blicke.
Mir chönnte ihn doch no dis no, uf Wiise ufe schicke.
Wär isch de das, mit Bart und Glatze,
wo müehsam duet der Born ufchraxle?
Der Dinu isch uf Neujork a ne Marathon go schpringe,
er bruchr der Schnuf, dass er im Gmeindrot cha e Grossi schwinge.
Der Ronni Reagen isch e Maa,
wo wetti chli der Fride haa.
Er wünscht, dass d'Russe ändlich ihres Rüschtigsbütsche chürze,
denn d'Schwizer leuge schliesslich ou lo Flüger abeschtürze.
