Ferti mit der Milchwitschaft, nur no Rindli meschte.
Und Fueter nimmt me schiint's bi s'Schmitt's ou nur s'Allerbeschte
Der Walterli dä het plagiert:
"I has a mir scho usprobiert!"
Früecher hesch no säuber müesse di a d'Urne quäle.
Jetz chasch ganz bequem deheim mit Zueschtellguver wähle.
Wahlverfälschig! papperlapapp
der Norwin holt se alli ab.
Der Chäs und d'Möuch vom Lädeli, s'Fleisch und s'Brot vom Meier.
Bim Beck chouf ig e Fingerhuet und es doze Eier.
I muess no schnäll zum Metzger loufe
go Antibebi-Pille choufe.
E Taxifahrer chunt is Frohsinn, wär het es Taxi bschtellt?
Der Hänsu het der Finger uf:" E ha grad Böne zellt.
Gang a Kiosk der Blick go choufe,
weisch e bi drum z'ful zum loufe."
Das Gebäll vom Hubacher, das isch scho lang vergässe,
ganz so heiss wie kochet isch, wird glich kei Suppe gässe.
Der Helmut cha jetz no dis no
am Ghüdertag voruse schtoh.
Könsch Du die Schtori vo de Ziegu, wo lang si blibe ligge?
Der Gubler Walti fluecht und seit:" Der Schtaat söl eine schicke."
und dä ….. vom Trotwar und vom Bundesgricht
hör uf das isch e andri Gschicht.
Der groosse Häuptling "Gelbe Feder", alias Hugo Moos.
Böösi Zunge bhoupte zwar, mit ihm sig nid vill los.
Er mischlet mit chli überall,
der nöischt Versuech isch Fäderball.
Der Hakla öise "Bouteräckter" isch e arme Gschtresste,
doch d' Sekretärin Angela, isch eini vo de Beschte.
Mer schiint der Klaus wird immer gsünder
und bout jetz alli Kurve runder!
Im Schuelhus isch e Souerei, s'WC isch verschtopft.
Der Amme het im Abwart schiint's e chli uf d'Finger klopft.
Hou, i der Duschi, dasch e Wucht,
do het's e ganzi Schteibilzzucht.
Der Super-Max-Affolter-Män het nes wider zeigt.
Wie me Paragrafe biegt und Sand i d'Ouge schtröit.
Es Honorar verlangt er keis,
villicht e chlini Schpaniereis.
