Fasnacht 2003 Lied Soiborschte
Mer hei z'Chappu nöii Hüser und paar auti heimer ou,
ond es Schuelhuus ond es Gmeindshuus ond es Hochhuus hei mer ou.
Mer hei z'Chappu ou e Gmeinroot, doch dä weis ned was är söu.
Mer hei z'Chappu no der Amme ond der Gsöu.
Ond mer si d'sexi-Bränte-Häxli im ganze Göi bekannt.
Mit ein Wangner-Bär befründet im Tüfu äng verwandt.
Mir choche Schnägge, gwörzt mit Rüebli
ond wenn's de grad muess sii
Verzoubere mir es Beizli ond drenke dört chli Wy
Mir hei d'UBS ond Credit-Suisse ond d'Winterthur ond d'Poscht,
ond e keine wo dört schaffet weiss wenn's ihm si Tschopp denn choscht.
D'FDP het Füerigssorge ond si finde lang kei Schef.
Jo mer wüsste da e Löösig ned vom WEF.
Nämed so Wes Sexi-Häxli im ganze Göi bekannt.
Mit ein Wangner-Bär befründet im Tüfu äng verwandt.
Mir choche Schnägge, gwörzt mit Rüebli
ond wenn's de grad muess sii
Verzoubere mir es Beizli ond drenke dört chli Wy
Der FC Chappu het nach 50 Johr sini alte Gründer g'ehrt,
doch das Datum während der Tschutti-WM isch haut chli verchert.
D'Pflotscher hei nach 10 Johr Gugge mou e riise Feete gmacht
ond im ganze Dorf het's zitteret ond kracht.
Cho si nur paar Sexi-Häxli im ganze Göi bekannt.
Mit ein Wangner-Bär befründet im Tüfu äng verwandt.
Mir choche Schnägge, gwörzt mit Rüebli
ond wenn's de grad muess sii
Verzoubere mir es Beizli ond drenke dört chli Wy
A der Schii-WM d's Sankt Moritz hei mer au Tag wie verrückt.
Öisne Schtaare wo dört fahre ganz verbisse d'Düme dröckt.
S'het nüt gnötzt, s'het niemer gunne ond mer hei ne d'Liebi könnt
Hei mer würklech nor d'Alinghi wo no günnt.
Näbst öis Sexi-Häxli im ganze Göi bekannt.
Mit ein Wangner-Bär befründet im Tüfu äng verwandt.
Mir choche Schnägge, gwörzt mit Rüebli
ond wenn's de grad muess sii
Verzoubere mir es Beizli ond drenke dört chli Wy
Was söue die Pföschte vor der Linde?
Sie ächt die dört für d'Ross aazbende,
oder das me ned cha über s'Trottwar fahre?
Im Boudepartemänt hocke gloub e chli Naare.
Eigentlech set's, so würde mer's gseh,
für e Marcel dört e Lüüchtturm gee!
Wär esch der Gröscht ? Der Pole het's gschafft,
a der Minigolf - Schwizermeischterschaft!
Är dänkt: "S'esch nüt bsunders die Ehredame.
Si esch no chli junq, süsch wär si im Rahme!"
S'esch s'Ruthli Metzler ond die seit verdutzt:
"dä Vögeli het mi eifach dutzt!"
Mer wüsse wie's im Fuessbau louft.
Wär ned guet tschuttet wird verchouft.
Eigentlech wäri das doch fein,
mer chönnte das ou i öiser Gmein.
Mer würde vor de nöchschte Wahle,
für e Dinu d'Transfersumme zahle!
Der Schwitzer zahlt näbscht huufe Schtüüre,
für s'Musigmache no Suisa-Gebühre!
Jetz chömme ou d'Guggemusige a d'Kasse,
das duet dene-öppe gar ned passe.
Mues acht der Schtuder Hans ou en Obolus brenge
Wenn är der "Schacherseppli" duet senge?
Drei Arteplasche i eim Tag bsueche,
wär so schnäu esch, muesch wit go sueche!
Öisi Behörde, die esch so schnäu.
Das würd me nie dänke vo dene - gäu!
Die mache das locker ond de git's no e Tescht,
ein Biertrenke zobe am Mattefescht.
Was esch denn das do sapperlott?
Hei mer jetz ou no EXPO-Schrott?
Oder ghört das zumene Horrorschtreife?
Mer hein'is ned chönne verkneife.
So gseht doch wörklech nei o Gruus
Es Härz bim Blueme - Theres us!
Der Schriiber Richi jo me seit's
Grüesst emmer fröndlech i der Beiz
Schtümpli rouche, Bierli drenke
Ou früeh aafo das duet eem schtenke.
Bim Richi chonnt's der emmer vor,
är machi z'Chappu s'gsellejohr!
Letscht Herbscht do hed mi Frou verzückt,
der schönschti Boniger a sech drückt.
Si schtreichlet zärtlech sini Hut.
Si küsst ne: "Schmatz!" Es chiöpft ganz lut¬
Den chräbelet si a sine Noppe:
"Us däm get's feini Chörbissuppe!"
Wär cha schlossere, schweisse flueche
ond met Vierradtöff umenanderrueche?
Ahänger hed är i jedere Grössi,
ou bem Rasemäjerflicke get är sich kei Blössi.
Der Roman cha aues, ou chli plagiere
ond der Lehrerin der Kafi med ein Schtapler serviere.
Im Borer het me d'Fädere g'schtuzt.
D Frou Dreifuess die hed d'Houe putzt.
Der Babscht hed scho vor fascht 30 Wuche
der Opus-Dei-Schef heilig gschproche.
Doch s'Wechtigschte wo esch passiert,
d'Sibyll het s'erscht mou sitwärts parkiert!
