Sis Tagwärch esch vör Höt vollbracht,
ou d'Beizerondi het är gmacht.
Der Marcel goht im Wiegetrett,
der Bärg uf, langsam, Schrett för Schrett.
Wenn däwä schwankisch meint me glii no,
sig'sch Kondiktör im Pendolino!
Die Troumpaar-Schance wot är packe,
der höbschi Michi, dä vo's Bracke.
Im Final hout's ned so sehr
drom set är zom Martin Ebner i d'Lehr!
Wenn är mou rechtig chönti bschiisse,
wörd Risiko sech om ehn riisse!
Bem Lüci het's e Märetschtand.
Fröschprodukt vom Buur vom Land
Härdöpfu, Blueme, Eier, Moscht
diräkt ab Hof, dasch super - Proscht!
Hüür wott's zom Süessmoscht, das wird loufe,
Öko-Schissi-Papier verchoufe.
D'CVP het keni Lüt,
ou d'FDP het keni Lüt!
D'SP het ou keni Lüt,
D'Parteie get's nömm, ou das macht nüt!
Wenn höt chasch Löchli i Wärtschrefte dröcke,
denn chasch aus Amme nocheröcke!
Der Ögerli-Martin, dasch kei Wetz,
isch öise gääli Pöschteler-Pletz.
Doch chörzlech het ne s'Glöck verloo
s'Rad vom Chaare het chli gloo.
Mer hei ne gseh im Graabe lande
"Gäu hesch der Elch-Tescht ned beschtande!"
D'Elektra Chappu brucht chli Gäut,
si hei drom Schtromrächnige gschtöut.
Der Schtrom choscht für Zwöizimmerwonig Potz
340'000 Schtotz.
Der Schmedlin ond sini Trabante,
hei Rächnige gschtöut grad wie Vagante!
O stille Nacht, o heilige Nacht,
viertuusig Lämpli das esch e Pracht.
Öber viertuusig Lämpli im Garte
ond met's drenn gsesch der Wingeier warte.
Der Kari wartend im Garte schtoht,
bes ehm ändlech mou es Liecht ufgoht.
Hesch z'Hägedorf der Kreisel gseh
do duet deer s'Härz ond s'Portmonnee weh.
Öb's schön isch, d'Houptsach esch, s'isch tüür,
die Honzikergruebe en Miniatür.
Ond Z'Chappu längt , dasch geil ou Läck,
ei Pfoschte för e gliichi Zwäck.
Mer wette do zwar niemer verpetze,
s'het zwee Woche brucht, för dä Pfoschte z'versetze!
Z'Chappu esch set nöischtem inn,
Schtäuzeloufe aus Disziplin.
Der Studer Urs het sech för das
e Minischüpp kouft, ganz nach Maass.
Schpeziell get's ou am Gmeindhuusschalter
Schtälze - Modell "Gmeindsverwalter".
För föfzä mou e Marathon
werdsch z'Chappu gehrt, das esch der Lohn.
Treniere duet är all Johr mee
das chasch a sim Figüürli gseh.
Jetz muesch no drei Schteer Houz versaage,
denn wird'sch zom Ehrebörger gschlaage.
