Bem Tschutte si mer halt derbi,
bem Schiifahre nor no e chli,
jetz döi mer no chli zom Vergnüege,
e schöni Oola-Wäue üebe.
Mer hei doch härzigi Sorge z'Chappu,
politisch hei mir chli der Rappu.
D'Wooge wei sech fasch ned glette,
jetz wott der Dinu no d'Chöubi rette,
wöu är der Wäg zwösche Chrütz ond Linde
em schlemmschte Fau wörd b'soffe fende.
Us Platzgrönd hei si i der Not,
under der Brogg no Fischerboot.
Ond wöu d'Luzärner ne chöi rönne,
het d'Chappelbrogg halt müesse brönne.
Mer chönnte doch us dene Grönde,
am Schützehuus es Boot aabinde.
D'Boniger das si edli Lüüt.
Si häufe de Walliser, s'röitse nüt.
S'Gäut wei si bringe ond bressiere,
ond s'Sitzigsgäut derzue kassiere.
Si chönnte ou, das wär zwar e dicke,
för 10 000-sig Franke Chees ufeschecke.
Der Enzo-Plotscher-Dünnere
duet am liebschte drümmele.
Sis Schlagzüg söu schiint's s'Gröschte si,
er chonnt nedemou zur Töre ni.
Sächs Drömmeli sis ond aui nöi,
aber bruche duet är gloub nor zwöi.
Der Koller Urs, duet schiint's jetz jodle
ÄR poschtet i der Waro obe
es chlises Zängli, könnsch der grond?
Dass är bem Jutzge ufe chonnt.
S'Ruthli meint: "das esch doch Quark,
si Fengergriff esch zemlech schtark".
Mer hei no wöue es Färsli mache,
öber d'Bundesrootswahlen, so chli zum Lache.
La la la la, Frou Brunner das wärs's.
Met Brunner get's z'Chappu kei rächte Färs.
Nei ehrlech, dasch heiku, mer döi ned öbertriibe,
jetz duet is de scho weder eine e Schandbrief schriibe.
Der Kusi ond der Marcel göi,
a d'Chöubi zäme, das esch nöi.
Em Kusi gfaut's zwar ned so rächt,
bem henderzifahre werd's em schlächt.
Dr Marcel lacht, är duet ned schtöne,
är het sech a "Hinderzi" muesse gwöhne.
Apropo nöi Finanzpresidänt
am Brokkischriiber kompetänt,
duet "fesselnd" Bütschezaale brenge,
wo "ou dasch fautsch", fasch emmer schtemme.
"E sueche", g'hörsch ehn ganz liis huuche,
"Foolie wo chasch Tippex bruuche ! "
Am Barbaratag, get's Schnetz ond Dronder.
Es passt fasch aune, dasch keis Wunder.
Em Wingeier goht dä Frass chli of d'Latte,
är hätti lieber Bärnerplatte.
Esch dä suur, oder Suurchrutt-Fän,
oder dänkt är no a d'Wahle fo Färn ?
Der Resu goht a d'Onderhaltig.
Är ond s'Nelly chlatsche gwaltig.
Em Resu gfaut's, das gset e Blende,
z'tanze, met der Helga fo der Linde.
Die zeigt es betzli föu fo de Bei
ond s'Nelly fuschtet; "Resu jetzt gömmer hei".
Bem Frieda Wyss chasch för paar Franke
Bleifrei ond au Super tanke.
Wöu's Frieda ned nor of d'AHV zöut,
het's e dritte Süüle b'schtöut !
