Der Fredli Hans duet s'Fleisch guet wörze
ond öppe mou vom Rössli schtörze.
sett'sch nor no ritte döi mer gloube,
wenn g'sesch im Ross deräckt i d'Ouge.
De hätte mer sösch no e Wonsch,
dass met de Chnöi grad z'Bode chonsch
D'Armee lot d'Brieftuube lo schtärbe,
do sett me sech chli drom bewärbe.
Me chönnt doch, s'wäri z'öberdänke,
die im Poschthauter verschänke.
Denn hätte mer, 's wär allerhand
en ächte Flogblatt - Poschtversand!
Der ATEL - Kurt, im Hanni sine,
macht Karriere, so ne chliine!
Bim Wirtschaftsförderigs-Verein,
isch är jetz Schef. Ou het dä Schwein!
Jetz fot är heimlech a vo schpaare.
Är wott no lehre Outofahre
Z'Bonige, der Sankt Urs goht zue,
werum hei ächt die drüü scho gnue ?
Hei ne Gescht ächt zwenig g'soffe?
Es isch doch immer so guet gloffe!
Der Grund esch klar, es isch jetz glunge.
S'het ändlech Jedi eine gfunge!
E ha deheim i Chüeuschrank gluegt,
do löpft's vor Gruuse mer der Huet.
E Worscht wo s'Datom esch vo Färn,
e ha doch d'Wörscht so Schampar gärn.
Bim reformierte Chelegsang,
längt das vör d'Tombola no lang.
Der Roli het im Induschtrii-
Quartier chli gschtörmt, jetz esch's verbii.
D'Schugger hei ne bloose loh
ond em drufabe s'Bilet gnoh.
Schtatt "Freiheitlichi", get's jetz nöi,
e Ghöder - Trettbrätt - Fahrpartei!
D'Onterhaltig hüür vom Turnverein
esch e Wäutreis, ou dasch fein.
Der Minder-Heinz schpöut sehr prätschiis,
derför esch Tanzmusig chli miis.
gsesch schööni Meitschi wo döi danze
ond chli z'vöu vom Kuchtaranze!
Die Chettine söue zemli nötze,
s'Chrüz vor Fauschparkierer z'schötze.
Der Pabscht, dä seit es sig e Sönd,
sech z'schötze vor e huufe Chend.
Z'Chappu esch es scho e Sönd,
wenn seisch du sig'sch e Schötzefründ!
Met Pestole ond met Höum,
esch eine i'd'Chäsi so ne Schöum.
Är hett ganz küen i'd' Kasse greffe,
bevor's rächt öpper hed begriffe.
Denn het är s'erscht mou d'Frou Fischer g'hört schreie
vor Schreck het är s'Gäut grad weder lo gheie!
Hets jetzt ändlech jede gsee?
z'Chappu hets e Kreisu gee!
D'Outofahrer - hei mer ghöört,
Chöi dröber fahre zwar, wie gschtört.
Hät dä Kreisu me koscht aus e Honderter-Note,
wär är z'Chappu abgleent worde!
