I'der Bränte Zonft, so chames läse
het's nöierdengs es wiiblechs Wäse.
Alexandra heist die Frou
ond guet usgsee das döig si ou.
Eine seit ganz onschiniert :
"Jetz heiter d'Lämpe programiert !"
Männerzonft schtot i de Schtatute
ond jetz hei meer e sone Pflute !
D'Emanze hei nis Gratuliert:
"Ändlich heit's ou deer kapiert !"
Anderi hei sech schwär empört,
das Zytigsböud das heig se gschtört.
"Das mues e Hooge sii zom gränne,
Wo sech eso a d'Bei lot länge !"
Reaktione hei mer kört,
vo mega Geil, bis "Sitter gschtört ?"
Sesch gar nüt wo zom Hemmel schtenkt,
mer hei nor öise Alex gschmenkt !
Är schtot dört wie ne Bodigard
am Nöijohrs Apero parat.
Met chorze Ermu schträngem Bleck
der Ärni Sepp är brengt ne deck.
Är luegt nor zue ond seit kes Wort
derför biibst's ständig em am Gort.
Wär säute fennt die rächte Wort
dä hänkt e Biibser sech a Gort !
Zwee riise grossi Schoggihaase
schtöut d'Barbara voross i Raase
d'Früeligssonne schint scho schön
derzue chont no es betzli Föön
Die Haase schmöuze dor d' Chraft vor Natur
jetzt gsäi si us wie der Bischoff vo Chur.
Dene Schoggihase chem's no glääge,
wemäne würd "Herr Dokter" säge.
Es esch e Süüch im ganze Land
aus fusioniert jetz metenand !
mer hätte do no e'Idee,
mer hei die wilde Hilde gsee.
Die Pauerfrou chönnti's mou probiere,
met em Meischter-Propper z'fusioniere
Wenn die Zwöi wörde ... ohalätz !
Das gäb doch nöji Arbetspläz !
Im Roppudenger got's jetz los
e mega Bouschtöu riise gross.
Föuse döi si use schpränge,
s'Aarebord gset us zom Gränne,
au dämm seit me Vortschret Puur
- wie im Atel Kurt d'Frisur
E Guafför het är ganz e düüre
doch dä Prozäss wird der Guafför verlüüre.
Der Otti Stech wird demontiert
ond aus Dänkmou abserwiert !
Ond z'Chappu bouet me e'Platz
bim Schuelhuus - esch äch dä för d'Chatz
dört häre wärde - so werd verzöut,
die usrangschierte Gmeinröt gschtöut.
Wo nemsch e usrangschierte Gmeindrot här,
nach de Waahle esch das net schwär.
Der Lenz vo Bonige ghört me phoubte
E be der Gröscht ou glii mou z'Oute
Denn s'Fitnessgschäft das buumet sehr
nor d'Banke schtöue sech chli quer,
Är get net uf das wär jo glacht,
Jetz werd haut Portmonee-bilding gmacht !
Aus Wärbig esch dä Värs jetz gloffe
wöu eg of nes Gratisabi hoffe.
S'Schmed's Huus esch jetz e Gallerie
d'Bsuecher göi dört uus ond ii !
Gsee chasch dört ganz moderni Schoker
doch s'Gäut setzt höt haut nömm so locker
Mer döi im Ursi, dass s'besser set loufe
äxtra es Nasepflaschter choufe
Der Eltereverein dä het mou z'Nacht
im Schuelhuus onde es Isfäud gmacht
Duss Regin wot d'Cheng go reiche,
do jättet ere eine e'Bögg id Schpeiche
si muess s'Velo heidräge das got net so reng
ganz zom Goudi vo de Cheng
Der Lack chas de flecke ond d'Speiche versträäbe
so duet me d'Wertschaft nöi belääbe
Der Studerus Peter got go tanke,
denn schäuet s'Natel :"Grüezi - Danke!"
S'Natel wäg ond dore schtarte
Zaalt het är jo scho met der Charte,
Jetz muesch nor s'nöchschte mou dra dänke
das der Schluch ou duesch abhänke
Der Delamuraz brengt's chli schpez,
jetz si d'Jode verrockt of d'Schwiz.
S'get Lüt wo's bau nömm ghöre möge,
wäg dene nachrechtelose Vermöge.
Mer Fasnächtler döi niemer erprässe ond zwenge,
mer chöi nor vermögelosi Nachrechte bringe !
