Mer wei n'is ned met Loob belade
doch d'Bräntezonft het hüür e Graade!
Öis macht s'Färslibrönzle Spass
ond der aus Publikum sit Klass.
Drom liebi Fasnachtskonsumänte
göi mer nach 20 Johr ned in Ränte!
Der Lack Werner flügt ab em Zwätschgeboum
ond s'Näfe Urs flügt ab em Öpfuboum.
Im Linde Röbi flügt en Ascht of e Chopf.
Ou der Lorenz flügt um dä armi Tropf.
D'Schutzängeli singe:"Tra La La,
d'Buure hei es Flogjohr gha.!"
Wenn nüt me louft ond schtoosch am Haag a,
verschribt der Dokter deer Viagra!
Ond wenn di Ranze wird zor Qual,
denn getz zom Glöck höt Xenical!
För döu wörd eis zwar no me nötze,
Zäpfli wo gäg Blödheit schötze!
Am Morge seit är schtooni uf,
denn machi zerscht e töife Schnuf!
Denn dueni vore Schpiegu schtoo,
ond tue mi Aableck of mi wörke loo!
Denn säg ee zo mer ond schöttle mer d'Händ:
"Schtöu der for Du besch Gmeindspräsidänt!"
Är het a sim Porsche stondelang krampfet,
Teili usgwächslet nöi gschprötzt ond abdampfet.
Denn goht är go fahre, of d'Strooss nor ganz gschwind.
Doch do schtoot e Tschugger ond schöttlet der Grend.
Är darf jetzt nömm fahre, das duet ehm so weh.
Denn s'Outo het zweni nach Porsche usgseh.
Wär esch do zmetzt i der Nacht hellwach,
ond macht ofem Schpöuplatz e riise Sach?
Belüchtet metem Outo der ganzi Platz,
schnogget ome ond seit emmer der glichi Satz.
Der Nick Roger eschs ond ghörsch ne fluche:
"Werom muess eeg emmer dä Noggi goh sueche?"
Bim Lienhard Heiri chasch nor schtuune.
Hei, het dä e grüene Duume!
Im Garte bout är sech e Mur,
ou Jätsauz ströit är zemlech stuur.
D'Muur muess denn wäg, ond s'Gjätt wachst witter,
nor im Rase dämm gohts schitter.
Wotsch chli brüner si rondom,
denn goosch haut is Solarium.
S'Bürgi Lisi ond s'Kuoni Moni
legge zlang drenn, so ganz ohni.
Zlang sönnele esch onvernönftig
verbrönnsch deer's Hender nämlech zönftig.
D'Rosi esch e Pflotscherfän,
ou i d'Prob goht äs so gärn.
Deheime het äs jo der Franz.
Doch einisch verzwiiflet dä fascht ganz
är lütet a: "Schatz mer döi dee vermesse,
der Mischa het nämlech aues verschesse!"
Der Jelzin suft ond esch senil.
Der Pöili z'Rom fahrt Papamobil.
Ond beidi gseht me öppe - o heie,
strouchle ond of d'Nase gheie.
Mached doch der alte Pflöck,
nach SUVA-Empfählig, e Gummi a d'Stöck.
Mer hei so schöni honderter Note
ou 200, 50er ond 20er si groote.
E Schöum seit sech, e mache säuber jetzt,
s'esch zwar ned ganz korrekt, nach Gsetz
är duet fotokopiere ond gsesch ne denn strahle:
"Jetzt chani is Poff ond a Kiosk goh zahle!"
