Play
Fasnachtslied 2008
Fasnachtslied 2008
Mer si es chlises Dorf und do esch's zemli glatt.
Doch mängisch finde i däm Dorf ou Fehde schtatt.
Denn lesisch's i der Ziitig so esch's gseee
oh so esch's gseee.
Mer hei e Gmeindeschriiber gha doch dä esch wäg.
Dä het vergässe Schtüre zahle, ou nei säg,
Är esch denn ab nach Thailand so esch's gseee
oh so esch's gseee.
Der Gmeindsverwalter wott
met em Amme of's Schaffott.
Die rüere nand nor Chnebu zwösche d'Bei.
Der Gsöu esch mängisch fies,
der Amme ou ned liis
was mer mit den zwene aues hei!
Me wott jetz met de Outo do us Wange wäg,
e nöji Schtross vo Oute bis i'd Mühli sett
ond denn esch fertig mit der Schtross o jeee
oh das duet weee.
Denn chonnt der ganz Verchehr bi öis durs Göi doruf.
Mer hei der Gschtank, der Dräck ond ou chli Müeh met Schnuf.
Das esch kei Lösig nei das cha's ned sii
nei cha's ned sii.
Ond der Regierigsroht
seit öis wo's doregoht.
Mer sige z'Chappu eifach schturi Lüüt
si heige jetz kei Gält,
s'gäb wichtigers of der Wäut
da bezeli Verchehr das machi nüüt.
So wissi ond es schwarzes Schof das het me gseh.
Of em Plakat vo öiser schtarche SVP.
Si hei die Wahle gonne doch ojee
s'Nivo - duet eim weh.
Am Kuonis-Bärgli het's mou weder richtig kracht.
Ond z'Kitzbühl hed der Didier Cuche grad s'Gliche gmacht.
D'Öschtricher hei die schnälle Schwizer gsee
nor, vo hende gsee
tschüss vo hende gsee !!!
Play
Der Müller-Adi
Der Müller-Adi, dä wo chli andersch tickt,
esch öppe mou met der Polizei im Konflikt.
I der Linde macht är, was keine sösch schafft,
met eim höuzige Wändli e Gartewirtschaft.
Amene schöne Tag, zobe wär Gmeindsversammlig,
hockt der Adi i der Linde ond esch e chli rammlig.
Schtatt d'Gmeindsgschäft go lose, sufft är e chli Bier.
Eis, zwöi, drüü oder vier.
D'Versammlig esch dore, d'Lüt chöme i'd Beiz.
Dr Adi hockt am sebete Bier bereits.
Do het är zwee Schtutz für Musig inveschtiert.
Das z'lut esch, het der Adi ned kapiert.
Drom zieht der Beizer der Schtecker us.
D'Musig verschtommt – he jo ohnu Pfuus!
"Die zwee Schtotz ghöre mer" seit der Adi chli besse,
Goht hei ond het d'Musigbox d'Schtäge ab grisse!
Play
Der Reto ghörsch
Der Reto ghörsch ganz lischtig lache,
so öppis chöi nor Froue mache.
Am Hilari het är der Beatle lo schtoh
ond het haut am Tag druf der Renault gno.
Är het denn fausch tanket, das esch schlimm,
Bänzin schtatt Disu jetz louft er nümm.
Play
Bip – bip – biiiip
Bip – bip – biiiip so tönt's ganz fin,
im Outo vo öiser Zunftkönigin.
Si het jetz e Höuf zom iiparkiere.
D'Barbara het das grad wöue probiere.
"Kräsch" het's gmacht - eigentlech hät sis begriffe.
Doch si het gmeint, s'heigere eine noche pfeffe.
Play
Mer - hei jetz e Opposizion
Mer - hei jetz e Opposizion,
met em Blocher ond sim Pflegesohn.
Der Toni Brunner esch jetz Präsidänt.
Er setzt sech i, ganz wehemänt.
Was brucht's, zom SVP-Spitzema?
Muesch fräch si ond darfsch net zvöu Hirni ha.
Play
Wäg Iifuehr-Verbot
"Wäg Iifuehr-Verbot", ghörsch der Büttiker chlage:
"goht's öisne Servela a Chrage!"
Kei Brasil-Rinder-Därm me, - för Hütt,
för öisi Servela, - s'macht nüt.
Die hei doch wäg däm, mer si überzoge,
im Blocher d'Hut über d'Ohre zoge.
Play
S'Nardo Brigitt blochet
S'Nardo Brigitt blochet s'Dorf doruf.
Glichzitig füert der Bader si nöi Traktor us.
Brigitt luegt schnäu wäg ond git ned acht.
E Blick of d'Chile-Uhr ond scho het's kracht.
S'Brigitt seit verdutzt: "Chas net verschtoo,
geschter esch om die Zit ou keine choo."
Play
Der Kurt, dä wo d'r Schtrom verchouft
Der Kurt, dä wo d'r Schtrom verchouft,
het sech fasch aui Hoor usgrouft.
Im Herbscht het är chli wöue schpaare,
d'Umwälzig bim Bassin abefahre.
Är dräit am Hebel ond wonderet sech sehr,
am Morge esch das Bassin leer!
Play
D'Mangarelli Jeanett sett
D'Mangarelli Jeanett sett,
Tochter hebrenge wo a Schporttag wett.
Im Schuelhuus onde si die zwöi ellei
d'Maria-Luisa macht e Schtei.
Die zwöi si vöu z'früeh ond fende das Schitt.
Si hei haut emmer no Summerzitt.
Play
Aus Pöschteler darfsch ned
Aus Pöschteler darfsch ned Pouse mache,
mer finde das esch ned zom lache.
Süsch chonsch im Blick, me het das gseh.
Me muess halt dene Töffli gee,
mit Drinkbidon und je nach Wätter,
Iistee oder Kafi-Jätter!
Play
Si het emmer so gschtrahlet
Si het emmer so gschtrahlet, of em Tennisplatz,
d'Maritna Hingis, öise Superschatz.
Jetz heisst's doch plözlech sie heigi dopt,
das esch doch ned möglech, die si jo beklopt!
Si het mer verzöut ond das esch e so,
ehre sig z'Zug chli Wöschpouver i d'Nase cho.
Play
Aus Coboy duesch ned velofahre
Aus Coboy duesch ned velofahre,
doch mer hei haut chli müese schpare.
Schtatt för n'es Ross, met Tämpramänt,
het's nor för nes Pony met Franse glängt.
"Das Pony" seit der Turnherr, ond dä chonnt drus,
"das gseht wie d'Francine Jordi us."
