Play
Fasnachtslied 2009
Fasnachtslied 2009
Melodie: Heicho, heicho
D'UBS esch of Amerika go inveschtiere,
der Ospel het der GW gha, wott nor no expandiere!
Refrain:
Heicho, jetz esch gnue, heicho jetz esch gnue
Heicho, heicho, heicho grad jetz………….
Wenn wotsch abnää und Du chasch, der Honger ned vergässe,
denn muesch of Olte dört bim Hammer chli go Kebab ässe
Refrain:
Heicho, heicho, heicho grad jetz………….
Der Ueli Murer esch jetz gwäut aus nöie Bundesroht.
Der Tüüfu frisst haut wörkli au Flöige i der Not.
Refrain:
Heicho, heicho, heicho grad jetz………….
Der Löiebärger Moriz hed si Tschopp scho mängs Johr g'macht!
Jetz wär's öppe Zit, ab is Silo 8
Refrain:
Heicho, heicho, heicho grad jetz………….
D'Frou Widmer-Schlumpf passt i der SVP ned is Kalkül.
Was do für Gift verschprötzt esch worde, gilt als Sondermüll
Refrain:
Heicho, heicho, heicho grad jetz………….
Der Pabscht dä duet dä Auschwitz-Lügner rehabilitiere.
D'Frou Merkel schisst ne zäme, si cha's ned akzeptiere
Refrain:
Heicho, heicho, heicho grad jetz………….
Ändlech schtoht das Minarett, d'Wangner närft das Grüsli,
derbi esch doch das Ding ned grösser als es Voguhüsli
Refrain:
Heicho, heicho, heicho grad jetz………….
D'Bräntezonft wird drissgi hür, das esch für öich e Gwünn.
E gloub mer göi a d'Börse jetz, de get's öis s'nöchscht Johr nömm.
Play
Fasnachtslied 2009
Het sech der Metzger e Fröndin zuegleit?
Är esch i der letschte Zyt super gschteilt.
D'Iris, si Frou närvt sech grüen ond blau:
"Der Hans het kei Fröndin!", Si weiss das genau,
"E goh ou zom Coiffeur ond färbe d'Hoor ou,
doch bi mer interessiert das wörklech kei Sau!"
Play
Öise Gmeindsverwalter
Öise Gmeindsverwalter esch jetz in Pension,
är zieht zwar no es Johr lang Lohn.
Me seit däm Überziit abboue.
I der Schtämpfuuhr muesch jo vertroue!
Är het haut ou nie Ferie plant.
Aber eis esch är gsi, der bescht SCHNEZUBANKLIFERANT!
Play
Was der Hitzfeld esch för d'Nati
Was der Hitzfeld esch för d'Nati,
esch för Chappu chli der Hacky.
Är duet der Fuessballclub trainiere.
Ou s'EM-Stöbli duet är füehre!
Ehn schiists aber emmer gruusig a,
wenn är nachem tschutte ned dusche cha.
Me schmöckt ned dr Schweiss, wotsch das ned begriffe.
Bi der schtinkt wörklech nome di Pfyffe.
Play
Nur no i de Fümuar
Nur no i de Fümuar vo de Beize,
döi di d'Ouge durend reize.
Meischtens es das Fümuar chli,
bi döune cha's ned gross gnue si.
Drom esch d'Idee gloub gar ned dumm,
mer toufe d'Linde:"Zur qualmende Hötte!"um.
Play
S'Näfe Feggi
S'Näfe Feggi esch jetzt nöi,
der Daniel Düsentrieb vom Gäu.
Är duet erfende ond experimentiere.
Bier-Böchse-Öffner konschtruiere.
Idee heig är none huufe,
nur, wär söu das Bier aus suufe.
Play
D'ATEL blibt ou
D'ATEL blibt ou als ALPIQ z'Oute.
Ou der Finanzdiräkter het sis Tschöppli chönne b'haute.
Är het för das kämpft ond het sech gwösst z'wehre.
För dä Schöbu Stüüre döi mer ne drom ehre.
Doch Baumgartner Kurt jetzt öbertribsch,
wenn Kurt met Q wie ALPIQ schribsch.
Play
Der Baschi het kei Schance
Der Baschi het kei Schance, met: "Chom breng ehn hei."
Ou der von der Heide ond Gotthard mache e suure Schtei.
Do chonnt es jongs Meitschi, ond jodlet wie lätz.
Verwiesst aui Stare of die hendere Plätz.
Der Roman und der Beni kommentiere dä Reige
Und d'Francin cha ehri Brüschtli zeige!
Play
Mer hei nor eine i der Währig
Mer hei nor eine i der Währig,
der Kädi-Dori esch hundert Jährig!
Der CVP Flury gratuliert,dasch klar.
Är hät es Gschänk före Jubilar.
Vor luter gratuliere, trinke und ässe
Het är sis Gschänk i der Buese vergässe
Play
Die Drei si alles Koller-Cops
Die Drei si alles Koller-Cops.
Die näme jede Gauner hops.
Die gäbe sech fasch nie e Blössi,
si mönschlech, hei e gwössi Grössi.
Smal, Medium und XXL,
nor si si äuä nömm glich schnäu!
Play
Der Dani stöut vorem Frohsenn
Der Dani stöut vorem Frohsenn 3 Tännli wie emmer.
Vorem Chrüz, brönne scho set Woche, a de Strücher Liechtli wie emmer.
S'Lisbeth, duet wie emmer d'Gaschtschtobe schmöcke.
Si darf, schnipp, a de Tännli, Äschtli abzwecke.
Das het aber Folge, oje oje,
Zobe brönnt a de Tännli keis Liechtli me.
Play
Öise Amme esch Wäutmeischter
Öise Amme esch Wäutmeischter im Fettnämpfli trampe.
"S'cha nor besser wärde" mer löi de Chopf ned lo lampe.
Der Ritter Markus schtoht i de Startlöcher parat.
Do wär no der Wyser Stefu, aber het dä Format?
Wenn der eine ned passt ond der ander ned chasch bruche,
de muesch's mettemene Zwöier-Ticket versueche.
